Briefwisseling. Deel 1: 1608-1634

498. C. Barlaeus⁵⁾. (L.B.)

Dic mihi, Constantine,

pecus cujum? anne Ratalli⁶⁾?
An potius Groti? nuper mihi tradidit οὔτις.

Addiderat litteras eruditas satis, quae arguerent, ab optimo parente profectum esse hunc foetum, quem ipsi exponere libuit, ut aliorum opera lucem videret. Ego, qui - pro pudor - linguam Gallicam non magis calleo, quam sus poëticam, aliorum judicia percunctor, ut quid de opere hoc statuere debeam, si non meis, aliorum saltem oculis cognoscam. Legit versionem⁷⁾ vir cl. et humanissimus Rivetus⁸⁾, utpote linguae Druidum peritissimus, quin et id sibi negotij dari passus fuit, ut a stribligine patrium suum idioma vindicaverit, ut vultum habitumque magis Gallicum induisse videatur epistola. Judicat idem vir, sic edi posse. Sed priusquam hoc fiat, consultum putavi, tuam super hac re sententiam exquirere. Intellexi ex D. Brosterhuysio etiam ad te missum exemplar. Ego castigatum mitto a limati judicij viro; forte jam magis placebit. Suspicor non levibus indicijs autorem esse Doubletium nostrum. Quid de opere tu judices, quem autorem designes, scire desidero. Legi poema Hooftij nostri⁹⁾, ἀεροβατοῦντος ϰαὶ τὸν ἥλιον εἰσορῶντος.

Multa Muijdensem levat aura cycnum,
Tendit, Hugeni, quoties in altos
Nubium tractus. Ego apis Batavae

More, modoque

Grata carpentis thyma, per laborem
Plurimum, circa placidas amoeni
Fluminis ripas, operosa parvus

Carmina fingo.

5) Uitgegeven in Barlaei Epistolae, blz. 313.

6) Nl. G. Rataller Doublet; zie blz. 215. Zie ook den brief aan Doublet in Epist., blz. 315.

7) Barlaeus' gedicht Epistola Ameliae ad Fredericum Henricum (zie blz. 260) was ook in het Fransch vertaald en hij wist niet, wie de vertaler was.

8) Vgl. blz. 259.

9) Nl. De Hollandse groet; zie blz. 276.

[p. 279]

 

Tu canes maiore poeta plectro

 

Principem, quandoque trahet feroces

 

Impares ferro, domitosque clivis

 

Nuper Iberos.

Ita enim libet Horatium παρῳδεῖν¹⁾. Vale, vir doctissime et charissime. Sed pene oblitus eram gratulationis tuae, quam non alio fundamento niti puto, praeterquam famâ. Mihi in hunc usque diem nihil de vocatione Amstelodamensi constat. Quid sit futurum cras, fugio quaerere²⁾. Quo fata trahent retrahentque, sequemur³⁾. Similis sum fundo, qui cum nullum habeam possessorem, primi fit occupantis. Iterum vale cum uxore et liberis. XV Mart. CIƆIƆCXXX.

1) Naar Od., IV, 2, vs. 25, sqq.

2) Naar Hor., Od., I, 9, vs. 13.

3) Naar Verg., Aen., V, vs. 709.