Briefwisseling. Deel 1: 1608-1634

[p. 206]

327. J. Wijts¹⁾. (H.A.)

Si les loix d'amitie se practiquent selon celles de la milice, je confesse estre coulpable devant vous, et me mets en posture à vous en supplier pardon. Je m'estois enquis ces jours passez a Mons^r de Calvart²⁾ de vostre sante, lequel me tesmoigna la crainte qu'il avoit d'une recheute, en cas que vinsiez icy trop tost, sur quoy le priois de vous conseiller a ne vous mettre en chemin qu'apres entiere et pleine guerison; en estans demeuré d'accord, je pris aussytost l'occasion d'en parler à nostre maistre, duquel je remarquois alors non seulement un grand con[ten]tement de toutes vos actions, mais aussy un soing tres singulier que ne fistes tort à vostre santé, en vous efforçant pour son service. Conseilla mesmes de ne bouger devant qu'estre bien gueri. Ayant donc prevenu le commandement dont m'aves honoré par vos lettres, je n'apporte [rien] pour toutte excuse, sinon que - m'asseurant de la victoire - j'ay batu heureusement. Depuis les vostres j'ay faict le debvoir selon la regle, et vous proteste avoir trouvé en l'ame de ce genereux Prince et tres bon maistre tout ce que scauroit desirer pour vous celuy qui est aultant zeleux de vostre bien, comme je me sens l'estre. Et vous prie d'en user de remede mesmes contre les facheux accez de ceste tant facheuse fiebvre, avecq laquelle n'estes ny en paix, ny en guerre ouverte, laquelle mesmes nous guerroye de si loing pour le ressentiment qu'avons de vos maulx, surtout qu'elle nous detient vostre presence tant desirée de toutte la court. Ce sera doncques avec double contentement que nous aurons l'honneur de vous revoir, et vous prie entretemps de me vouloir continuer l'honneur de vos affections. M'estimant heureux, quand j'auroy l'occasion de vous pouvoir rendre du service, je vous baise tres humblement les mains et vous demeure.... A l'armee, prez d'Iselburghe, ce 18^e de Aoust 1626.

1) Zie blz. 199.

2) Zie blz. 153.