Briefwisseling. Deel 1: 1608-1634

156. Maurits Huygens¹⁾. (A.B.)

Je m'en voy preparer celle cy pour la premiere occasion a venir, et devant qu'elle vous viendra en main, vous serés des longtemps, si non des a ceste heure, imbu de la continuation des bonnes nouvelles du Palatinat. Touttefois puisque par vostre derniere du 29^e May que nous avons receu avant hier, 6^e Juing, vous dittes que les Seign.^rs ambassadeurs et le S.^r leur secretaire ont volontiers quelque chose de bonne main, voycy comme je les ay veu de la main de Bilderbeke²⁾ mesmes, ou a peu pres. Que la ville de Hagenauw, ayant esté delivrée de siege, l'archiduc Leopold et ses trouppes auroit tellement esté mis en routte, que ce luy a esté beaucoup de sauver sa propre personne en trajectant le Rhin par un petit bateau, et de si pres poursuivy, qu'il ne s'en falust point l'espace d'un quart de lieue qu'il ne fust fricassé. Qu'apres 6 cornettes de cavalerie du service de l'Empereur se seroyent trouvé en un boscage pres de la ville de Strasburgh, ou apres avoir sejourné 3 jours sans pain ne manger, ils auroyent faict presenter leur service au magistrat de la ville, qui les ayant refusé, s'excusant de n'avoir affaire de cavalerie, le colonel Obertraut de bonne fortune se trouvant la, les seroit allé trouver, et apres une petite capitulation les auroit receus au service du Roy de Boheme, son maistre. Qu'un duc de Saxe, aussy du service de l'Empereur, en ayant entendu le bruict, seroit venu en toute haste les semondre de leur devoir, et les induire de demeurer au service de leur maistre et du sien. Et ledit Obertraut en estant adverty, auroit envoyé un sien cousin qui, estant sorty avecq quelques gents, vous auroit attacqué mon duc de Saxe, luy troisiesme avecq deux autres cavaliers, et apres les avoir desarmé, les auroyent mené prisonniers a Hagenauw. Lesdits 6 cornettes auroyent declaré n'avoir esté payés en l'espace d'une ronde année d'une seule dute. Et que des autres regiments seroyent a la veille de suivre leur trace. Si tout cecy n'est vray - on croit assés fermement qu'ouy - au moins c'est un beau conte, et prou de petites particularités pour agencer un specieux mensonge.

Je me fasche de vostre part de l'indiscretion et plattecheyt de ces Mess.^rs les editeurs de vos poësies. Je ne suis point assés sage pour vous conseiller; touttefois puisque la pierre en est jettée, il me semble qu'il n'y auroit pas meilleur moyen d'en eviter le coup, que de leur faire mettre tout en suitte et ensemble avecq cest autre en lumiere, mais sur leur nom, ou au moins soubs une preface qui fist veoir qu'il ne vint pas de vous, voire qu'il fust faict en vostre absence. Touchant communem formulam: hortatu amicorum. Vous scavés que passé des années je le vous ay conseillé; et si nunc vis, rogo et hortor.

1) Een paar zinnen van den brief zijn uitgegeven door Dr. Th. Jorissen, Constantin Huygens, blz. 110.

2) H. van Bilderbeeck was reeds in de eerste jaren der 17^de eeuw agent der Staten-Generaal te Keulen en is dat vele jaren gebleven. Hij leefde nog in 1640.

[p. 102]

Il y a 2 ou 3 jours que je commençay celle cy; aujourd'huy c'est le 10^e. Avant hier les chevaux du Prince Henry partirent; il est party luy aujourd'huy a 6 ou 7 heures; le rendevous est a Emmerich, et selon touttes apparences Son Ex.^ce sera peu de jours a le suivre. On dit que tout nostre college pourroit bien aller a l'armée, et puis voila de la besoigne taillée pour moy¹⁾. Je n'y ay pas tant de loisir qu'autresfois pour diverses considerations. S'il n'y va que de deputés des 2 colleges, je suis tout resolu - mais qu'il S.^r Padre le trouve bon - si d'avanture on se voulust servir de moy, de m'en excuser. Je fais plus de proffit icy en toutte façon, qualitate et quantitate, et a moins de peine, et peut estre autant de gré.

Il court un bruict pardeça, et le monde le veult croire, de bonne quantité de soldats anglois, qui pour avoir esté trompés, leur levée ayant esté faicte sur le nom des Estats du Pays bas, et en effet pour le service du Roy d'Espaigne, se seroyent afranchy de leur service, et faict le diable a 4000 parmy leurs officiers. Nous en attendons la verité par vos prochaines. Je sors a ceste heure de la secretairie pour fermer cellecy, parce que Mr. Willem de l'ambassadeur me dit qu'il la luy fault avoir devant midy pour l'envoyer par voye de Zelande. Adieu.

Achevé d'escrire le 11^e Juing sur les onze heures avant midy²⁾.

1) Maurits Huygens kreeg den 1^sten Nov. 1617 eene betrekking aan de secretarie van den Raad van State (vgl. Dagboek, blz. 9) en is 9 Januari 1624 tot secretaris benoemd in plaats van zijn vader (t.a.p., blz. 10).

2) Huygens teekende op de brief aan: R(ecepi) 17^o Junij 1622.