Milenus clachte

[p. 152]

[Een Coninck van Egypten seer = verheuen]

Een Coninck van Egypten seer=verheuen,

Ptolemaeus Arsacidae ghenaemt voorwaer,

Heeft dese Tafel wel eer = gheschreuen,

Die Marcus Aurelius vondt daer naer,

Tot eenen Priester van Thebe eerbaer.

Die zij ghemeynlijck hinghen = ten thoone

Aen die poorte vanden palleyse, aldaer

D'Egyptsche Coninghen ontfinghen = haer croone.

Noyt verhieff ick rijck tyrant onweyrdich = zijnde,

Noyt en verschoond'ic d'arme rechtveyrdich = zijnde.

Noyt ontseyd'ick d'arme, om d'armoede, oordeel:

Noyt en de'ick die rijcke, om haer goet, voordeel.

Noyt en gaf ick ghiften, uyt jonsten alleene.

Noyt en straefd'ick iemant om een misdaet cleene.

Noyt en heb'ick quaet onghestraeft = ghelaeten:

Noch weldaet ongheloont, maer begaeft = met baten.

Noyt liet ick ander oordelen een claer saeke:

Noyt en de'ick van doncker alleen d'uytsprake.

Noyt en weygherde ick recht diet begheerde,

Noch ghenade die goede die hem verneerde.

Noyt en heb'ick iemant ghestraeft door haet oft nijt:

Noch ghiften belooft in voorspoedichen tijt.

[p. 153]

 

Noyt en was ick onachtsaem in voorspoedicheyt,

 

Noyt bedroeft in teghenspoet door cleynmoedicheyt.

 

Noyt en heb'ick arch bedreuen uyt quaetheyt:

 

Noyt faeld'ick door giericheyt, oft obstinaetheyt.

 

Noyt en heb'ick d'oproerighe voorghestaen:

 

Noyt en hoord'ick naer flatteerders vermaen.

 

Ick hiel my wel bemint onder die goede,

 

En dede my vreesen van quad, en onvroede.

 

Om dat ick d'arme jonst droegh, die weynich vermochten,

 

Hielp my God teghen groote, die my beuochten.

H ebben die Heydensche Coninghen en Princen
O ns sulcken exempelen achterghelaten,
V eel te meer behooren die Christen Prouincen
W el gheregeert t'zijne van die Potentaten.
A l zijn ghebreckich die ondersaten,
E en Prince die deughlijck, wijs, en vailiant = es,
R egeert zijn ghemeynte altijt by maten,
T 'zy ofter orloghe oft peys in t'lant = es.

FINIS.