Milenus clachte

[p. 147]

[In t'jaer vander Roomschen fondatien]

In t'jaer vander Roomscher fondatien,

Als zy dry hondert en achtiene schreuen,

Orlooghde Roome teghen Sarmatien:

Die Lucio Pio hebben last ghegheuen

Dat hy die Sarmates sou bringhen in sneuen:

Die met groote heyrcracht trock naer dat lant.

En naer datter veel volcx inden slach was bleuen,

Hebben zy ten lesten ghemaect bestant.

En Lucius Pius heeft zijnen vijant

(Duerende den trefues) soo ghetoeft met wijne,

Dat gy hem Roome subject gaf ten sijne.

Als den peys ghemaect was en t'verbont = volbrocht,

Quam Pius te Roome met magnanimiteyt:

Die aen de Senateurs terstont = versocht

Die ghewoonlijcke triumphe voor zijnen aerbeyt,

Die zy hem alleene niet en hebben ontseyt:

Maer brochten hem der doot seer onghenadelijck,

Om dat hy met sijnen vijant in t'feyt

Van orloghe, hadde ghehandelt verradelijck.

En naer zijn doot schreuen zy versmadelijck

Dees Epitaphie op zijn sepulture.

Die t'soete meynt nutten, smaect dicwils t'sure.

Hier ligt Lucius Pius, een vanden Raetsheeren
Die de Sarmates verwont, en haer goet ghedijlt = heeft:
En diese met meerder schanden, dan met eeren,
In t'jaer dry hondert achthiene versubtijlt = heeft.

[p. 148]

 

Hy en verwontse niet, soo die Romeynen plochten

 

Hun vijanden met cracht te verwinnen;

 

Maer soo tyrannen hunnen vijant oyt sochten

 

Te bedrieghen met subtijle sinnen.

 

 

 

Hy en heeftse cloeckmoedich inden strijt

 

Met feyten van wapenen niet willen crincken:

 

Maer aen de tafel, tot zijn eeuwich verwijt,

 

Heeft hyse verwonnen met wijn te drincken.

 

 

 

Hy en heeftse niet verwonnen in t'vechten,

 

Daer hy in t'perijckel zijns lijfs was gheseten

 

In t' middel van zijn ruyters en knechten;

 

Maer wel in t'bancketeren, al eten.

 

 

 

Hy en heeftse niet verwonnen metter lansen

 

Corragieusselijck in een black velt;

 

Maer in een camer, al triumpheren en dansen.

 

Hierom was hy vande Romeynen ghekelt.

 

 

 

Dit opschrift was ghestelt vande Romeynen

 

Op zijn sepulture inden tempele,

 

Ten eynde dat alle Capiteynen

 

Daer aen souden nemen goet exempele.

Finis.