Milenus clachte
(1578)–Johan Baptista Houwaert–
Auteursrechtvrij
[pagina 137]
| |
[Die clachte der deught] Die clachte der deught ouer t'swerelts abuysen,
Hoe haer die boosheyt heeft doen verhuysen.
AL es die werelt nu vol tribulatien,
Door peste, orloghe, en diere tijden,
T'en es gheen wonder: want meest alle natien
Verlaten den rechten wech, en gaen besijden.
Niemant en wilt hier wettelijck strijden:
Niemant en hout zijn conscientie net.
Dien de liefde beuolen es, d'een d'ander benijden.
T'volck es ouer al euen sondich besmet.
Niemant en hout mate, oorden, reghel, noch wet:
Maer ieghelijck leeft nu naer zijn behaghen:
Door welck sondich misbruyck, en boos opset,
Zijn wy lijdende verscheyden plaghen.
D'abuysen der werelt zijn seer te beclaghen.
| |
[pagina 138]
| |
Gheestelijck en werelijck leuen nu in twiste,
Dwelke ontallijck veel volcx bringht inden noot.
Moordadicheyt soect met arghen liste
Ouer al d'onnoosel te bringhen ter doot.
Daer ghebeurt nu menich deirlijck exploot,
Door dat d'ingheboren es t'slants verradere.
Afjonsticheyt sluyt voor vrienden zijn broot,
Dwelck twist causeert tusschen kindt en vadere.
Broederlijcke minne wordt lancx soo quadere,
En leyt haren naesten secrete laghen:
Soo dat wonder es, dat wy allegadere
Ons voor Gods wrake niet en versaghen.
D'abuysen der werelt zijn seer te beclaghen.
Ghelooue, Hope, en oock Charitate,
Die zijn vande herezije ghekelt.
Ghemeynen oirboor es van d'eyghen bate
Ghepluct, berooft van zijn goet en ghelt:
Rechtveyrdicheyt es met cracht en ghewelt
Vande boosheyt (eylaes) bijnaer versmacht:
Moghentheyt heeft d'arm peupel onder voet ghevelt:
Verraetschap heeft t'slants welvaert t'onderbracht:
D'exactie die arbeyt dach en nacht,
Soo den wolf doet, om t'schaep totten been te cnaghen:
En want den herder zijn schapen qualijck wacht,
Soo werden zy deirlijck verscheurt by vlaghen.
D'abuysen der werelt zijn seer te beclaghen.
| |
[pagina 139]
| |
Als nijt en ghiericheyt t'lant inne namen,
Werdt liefde verjaeght, en beneuolentie.
Doen hooueyrdicheyd en gramschap ouerquamen,
Soo vloot ootmoedicheyt en patientie.
Die gulsicheyt verstoot nu d'abstinentie,
En d'oncuyscheyt verdrijft die reynicheyt:
Traegheyt bewoonet t'huys van deligentie:
Voor schaemte en eere regneert vileynicheyt:
Practijcke doeghet recht groote cleynicheyt:
Ontrouwe en aensiet vrienden noch maghen.
Beteren wy ons niet, inder certeynicheyt,
T'gater al verloren in corten daghen.
D'abuysen der werelt zijn seer te beclaghen.
Inden stoel der ghenaden sidt tyrannije:
Ouerdaet drijft compassie uyt die landen:
Seruituyt heeft de vrijheyt verwonnen met strije:
En wille houdt reden ghesloten in banden.
Iustitia die maeght es van haer vijanden
Soo deirlijck mishandelt, dat zy leyt besweken.
Concordia es verdreuen, t'onser schanden,
Van tweedrachticheyt, die daer wilde doorsteken.
Waerheyt en wijsheyt zijn van hier gheweken,
Door groote vreese van onverdiende slaghen:
Zy en mochten voor hooghe noch leeghe spreken,
Als zy voor t'slant welvaert iet wilden ghewaghen.
D'abuysen der werelt zijn seer te beclaghen.
| |
[pagina 140]
| |
PRINCE.
Wilt ghy nu ter tijd leuen in vreden,
Gheuet God al op, en zijt verduldich.
En werdt ghy van t'vleesch, werelt, oft vijant bestreden,
Blijft uwen Schepper (als Iob was) ghehuldich;
En doet uwen vijant deught, soo ghy zijt schuldich;
En laet die boose werelt die werelt zijn.
Al ziet ghy t'volck dwalen menichfuldich,
Peyst dat naer misdaet volght iammerlijck ghepijn.
Wy moeten eens al rekenen voor Gods aenschijn,
Daer elck zijn selfs pack sal moeten draghen:
En daer van penitentie gheenen termijn
Meer zijne en sal, daer wy nu luttel naer vraghen.
D'abuysen der werelt zijn zeer te beclaghen.
FINIS.  | |
[pagina 141]
| |
Daer gheestelijck en werelijck leuen in gheschille,
Daermen voor recht ghebruyct tyrannije,
Daer in plaetse van reden domineert den wille,
Daermen d'uyterste wraeck doet door envije,
Daer die borghers omgaen met verraderije,
Daer den Prince zijn volck exactioneert,
Daermen te niet doet goede politije,
Daer veel volcx op d'arm ghemeynte braggheert,
Daermen die goede verjaeght, en executeert,
Daermen t'ghemeyn goet confisqueert liberalijck,
Ten es gheen wonder al gaghet daer qualijck.
Daer d'ondersaten haken naer t'Princen doot,
Daermen te straffe es om zijn leedt te wreken,
Daermen orloghe vuert sonder grooten noot,
Daermen t'slants Priuilegien siet breken,
Daermen deught en wijsheyt siet versteken,
Daermen gheenen goeden raet en wilt gheloouen,
Daermen niet vrijlijck en mach de waerheyt spreken,
Daer den Prince ghelooft die hem verdoouen,
Daermen den lantman siet slaen, en beroouen,
Daer t'lant gheregeert wordt van een verslondere,
Al gaghet daer qualijck, t'en es gheen wondere.
| |
[pagina 142]
| |
Daermen wreede Rechters inden raet wilt setten,
Daer den Prince in boosheyt blijft obstinaet,
Daermen leuen moet naer quade wetten,
Daer God niet geureest en wordt vanden Magistraet,
Daermen ghetrou dienaers den hals afslaet,
Daer t'gheheel lant gheschoren wordt en gepluckt,
Daer niemant den ghemeynen oorboor voor en staet,
Daer een ieghelijck zijn eyghen bate suckt,
Daer weduwen en weesen worden verdruckt,
Daer wet, oorden, noch liefde en es finalijck,
T'en es gheen wonder al gaghet daer qualijck.
| |
Prince.
Te wijle dat v God gheeft prosperiteyt,
Regeert v seluen, en t'lant naer Gods mandäten,
En ghebruyct voor straf rigeur saeghtmoedicheyt,
Wildy bemint zijn van v ondersaten.
Een wijs Prince, die tot zijnder baten
Wel gouverneren wilt zijn landouwen,
Moet zijn volck beschermen, en in vrede laten,
En zijnen ghesworenen eedt wel houwen.
Want daer een Prince ter quader trouwen
Die ghemeyn welvaert soect te bringhen t'ondere,
Al gaghet daer qualijck, t'en es gheen wondere.
FINIS. |
|