|
| |
| |
| |
[Die Antheniensen hebben ghesonden]
Die Atheniensen hebben ghesonden
Desen brief aen die Lacedemoniers:
Waer inne (soo my dunct) wordt beuonden
Seer goede leeringhe op weynich pampiers.
Den Raet, ghemeynte, midsgaders die Wijse
Van Athenen, wenschen met rijpen aduijse,
Den Raet, ghemeynte, en wijse mede
Van Lacedemonien, ghesontheyt en vrede.
D'onsterflijcke Goden die moeten wesen
Onse seker ghetuyghen in desen,
Dat wy in die voorleden orloghen
Niet min drucx en hadden naer ons vermoghen,
Dan wy aen d'ander zijde en waren verblijt,
Dat wy v hadden verwonnen in t'crijt.
Want die schaden der orloghen zijn soo groot,
Dat het verlies en allendighen noot
Den verwonnenen seker en warachtich = is,
En den verwinder seer twijfelachtich = is.
Wij wilden wel dat ghy te voren = hadt,
Eer ghy den slach teghen ons verloren = hadt,
| |
| |
Begheert t'ghene dat ghy versuect = nu:
Maer t'es te laet, want ghy zijt verdruct = nu.
Het moeste soo ghepredestineert = wesen,
Dat ghy soudt ghesaccageert = wesen:
En dat het verlies van uwe lantsaten,
Ons veel meer soude schaden van baten.
T'es eenen reghel die selden ghefailleert = heeft,
Dat al t'ghene dwelck God gheresolueert = heeft,
Gheen menschlijck verstant beleuen = en can,
Noch menschen cracht hem daer teghen setten = en can.
Ghy versoect dat wy d'orloghe staken = souwen,
En dat wy drij meant bestant maken = souwen,
Om in middelen tijt van peys te tracteren:
Daerop dat wy v dit responderen:
Den Raet van Athenen, noch die Potentaten
En zijn niet ghewoene bestant toe te laten,
Om daer naer weder orloghe te vueren.
Want wy oude wetten hebben, die rueren,
Dat wy den strijt trachlijck aenveyrden = souwen,
En liberaelijck den peys in weyrden = houwen.
Wy soecken wijse mans die selden dolen
In tijen van peyse in onse scholen:
Om dat zy in tijen van orloghe, als wijs',
Ons bijstaen souden met goeden raet en aduijs.
| |
| |
En dese raden ons dat wy nimmermeere
Bestant en souden maken met Prince noch Heere,
Besonder daer eenighe conditie
Werdt ondersproken, daer op valt suspitie.
En desen raet en willen wy niet versmaden,
Om dat zy ons wel en te rechte raden.
Want in gheveysden peys voorwaer = is
Meer perijckels, dan in strijt die openbaer = is.
Den Philosooph Euxinus, die ghy hebt ghesonden
Als ambassadeur, heeft door zijn soet vermonden
Ons soo discretelijck aenghetaelt,
Dat ons docht (naer dat hy die saeck hadde verhaelt)
Dat wy t'onrecht zijn suppliceren
Hem souwen moeten hebben refuseren.
Want t'is veel eerlijcker te jonnen den vrede,
Den ghenen dijen met ootmoedighe bede
Begheeren, dan dijen door die lance winnen.
Hier om eest dat wy uyt jonstigher minnen,
Die van Lacedemonien ontslaen
Vander orloghen, en consenteren hun voortaen
Eenen eeuwighen vrede. En dit sal gheschien,
Om dat alle menschen souden hooren en sien,
Dat die van Athenen zijn goethertich teghen
Hun vijanden: en dat zy seer zijn gheneghen
| |
| |
Totte wijse, en dat zy die dwase Capiteynen
Wel weten te straffen als vileynen;
En hun seluen wel connen laten ghebieden
Vande Philosophen en wijse lieden.
V is wel kennelijck dat ons orloghe fiere
Was op die possessie vande Riuiere
Steden Melena: maer nu vercleeren = wy,
En by d'onsterflijcke Goden sweeren = wy,
Dat wy al ons recht stellen besijen = nu,
En die steden gheheel vertijen = nu,
Behoudelijck dat ghy ons uwen ambassadeur
Euxinus den Philosoph, wilt laten daer veur:
Want Athenen florerende in voorspoet,
Heeft lieuer een wijs Philosoph goet
Voor haer scholen, dan voor haer stadt een Prince
Oft voor haer ghemeynte een heel Prouince.
En ghy Lacedemonsche mans en vrouwen
En wilt voor gheen lichtveyrdicheyt houwen.
Al est dat wy ghewillichlijck nu te tije
Ouergheuen die steden, en heerschappije,
Daer wy mochten ghebien den armen en elen,
Om eenen ouer ons te laten beuelen.
Want wy dit doen, om dat den Philosoph verheuen
Ons leeren sal hoe wy wel behooren te leuen.
| |
| |
En v lantschap, dwelck wy nu begheeren te deruen,
Veroorsaeckte ons om qualijck te steruen.
En alsoo wy van seer oude vijanden
Ons verclaren aen v en aen uwe landen
Voor oprechte waerachtighe vrinden,
En willen wy v niet alleenlijck toe sinden
Den eeuwighen peys: maer v noch daerenbouen
Eenen raet gheuen, die weert is om louen,
Om den peys onverbrekelijck t'obserueren.
Want van meerder excellentie in d'opereren
Is die medecijne die ons ghesont doet blijuen,
Dan den dranck die de cranckheyt can verdrijuen.
Wilt dan achtervolghen desen wijsen raet = nu,
Dat alsoo ghy v Ionghelinghen metter daet = nu
In feyten van orloghe leert exerceren,
Dat ghyse van joncx, en in tijts, doet studeren.
Want soemen metter lancen t'volck can vermoorden,
Verwerftmen den peys met soete woorden.
Ghy Lacedemoniers, en wilt niet versmaden
Onsen raet: noch peysen dat wy v raden
Sonder oorsake, dat ghy v Ionghelinghen = stout
Van joncx in onse scholen bringhen = sout,
Om dat zy haer jeught niet beclassen = en souwen,
Noch oock in boosheyt opwassen = en souwen.
| |
| |
Want voor dat den eenen ghebreect verstant,
En dat den anderen boos is en onvaliant,
Rijsen onder die Princen d'orloghen;
Dwelck d'arme becoopen, dies niet en moghen.
En peyst oock niet, ghy Lacedemoniers,
Dat wy die lieden beminnen die veel tiers
Met woorden maken, oft t'volck abuseren:
Want ons vader Socrates plach te commanderen,
Dat by d'ierste lessen in zijn scholen
Den discipelen soude worden beuolen,
Dat zy in twee jaren en in twee weken
Hem niet en mochten verstouten te spreken.
Want t'es onmoghelijck dat iemant in t'spreken vroet
Soude wesen, ten zy dat hy ierst leeren swijghen moet.
Ons dunct, indien dat ulieden aenstaet,
Dat Euxinus den Philosoph in onsen raet
Wel behoort te blijuen, door zijn scientie,
Sijt seker, est dat wy door zijn presentie
Eenich proffijt vercrijghen binnen sijnen leuen,
Dat ghy door den raet die hy ons sal gheuen
Gheen schade en sult, maer voordeel daer met = hebben.
Want wy van Athenen een oude wet = hebben,
Dat den Raet gheen orloghe en mach aenveirden,
Ten zy dat bijde Philosophen van weirden
| |
| |
Ierst en voor al wel gheexamineert = werdt,
Oft zy te recht, oft t'onrecht gheinstitueert = werdt.
Hier mede bidden wy met ootmoede,
Dat d'onsterflijcke Goden in haer hoede
Ons en v persoonen, onse en uwe landouwen,
In desen peys eeuwelijck willen houwen.
Want alleene sal dat gheduerich wesen = stille,
Dat beuesticht is door Gods ghepresen = wille.
FINIS.
|
|
Auteursrechtvrij