Den handel der amoureusheyt

[fol. Y5r]

Voor-reden op d'arguatie vanden ouden Man teghens een jonghe Vrouwe.

MAer zijn't niet wel vreemde en wonderlijcke zaken,
Dat een Vrouwe zoo vele door liefden doet,
Dat sy ten lesten moet om smaken
Een stoop azijn voor een druppel zoet?
Als ghy wilt baeyen inder vreuchden vloet,
Ziet dat ghy daer inne niet en verdrinct:
Die zoo verblint is en zoo onvroet,
Dat hy naer ongheoorlofde vreucht verlinct,
Die moet peysen dat hy syn eere krinct.

Maer 'tis kleyn wonder datmen Venus zach dolen,

Die daghelijcx zoo veel volcx tot liefden trect,
Al smaken de brocxkens zeer zoet ghestolen,
Die doolt, hem zelven schande verwect;
Vyerighe liefden en wilt niet blijven ghedect,
Want sy de menschen heel blint kan maken,
En dan worden sy vande weerelt ghehouden suspect,
Als sy niet wel en bewimpelen hun zaken,
Die naer ghestolen brocxkens haken.

Liefden beneemt zin, reden en verstant,

Zoo ghy speelwijs hebt moghen aenschouwen,
En Cupido met synen vyerighen brant
Die kan alle deuchden achterwaerts houwen:
Wacht v dan, beminde vrienden vol trouwen,
Van onbetamelijcke liefden te draghen,
Die hun begheven tot ghehoude Vrouwen,
Staen in perijckel van te worden gheslaghen,
Want naer de misdaet volghen de plaghen.

[fol. Y5v]

 

Ghy weeldighe Mans wilt v dan wachten en mijen,

 

Te ghebruycken onbetamelijcke jubilatie,

 

Al meynt ghy secretelijck Lief te vrijen,

 

Ghy brenght haer en v zelven ter blamatie:

 

Wederstaet in't beghinsel Cupidinis temtatie,

 

Al macht' uwer herten wat verdrieten,

 

Want voor een korte recreatie

 

Moet ghy dickwils duysent doleuren ghenieten,

 

Als den brant groot is kanmense qualijck uyt-gieten.

 

 

 

Ghy Vrouwen bewaert altijt wel v eere,

 

Want v eere is uwen besten schat,

 

Die eens doolt en zal dan nimmermeere

 

Syn eere weer krijghen, zegh ick v plat,

 

Maer blijft ghy in't Palleys van eeren, en eest dat

 

Ghy quaet ghezelschap schout vroech en late,

 

Zoo zult ghy voor deuchdelijck al Stat

 

Door ghereputeert worden t'uwer bate,

 

Een eerlijcke Vrouwe Houdt middelmate.