Den handel der amoureusheyt

(20ste eeuw)–Johan Baptista Houwaert– rechtenstatus



[Folio I7r]
De prologhe van het tweede spel. GHy joyeuse Amoureuse zinnen, Ghy hebt ghehoort hoe Echo was in't verstranghen Door blakende liefde, en hoe sy in't prisoen van minnen Van Wonderlijck murmureren was ghevangen, En hoe dat sy met betraende wanghen Haren swaren druck jammerlijck gheklaecht,, heeft, En hoe Orpheus, door het vyerich verlanghen, Haer een wonderlijck visioen ghewaecht,, heeft, 'tWelck haer gheplaecht,, heeft. Nu zult ghy hooren vrienden in't ghemeyne, Hoe Narcissus ter jacht gaet met syn Heeren, En hoe Actheon dolende quam aen de Fonteyne, Daer Diana baeyde naect zonder kleeren, En hoe Actheon haer wilde onteeren, Als hy haer naect lichaem hadde ghezien; En hoe Diana Actheon dede verkeeren In ghedaente van eenen Hert, die moeste vlien Met bedroeft engien. En hoe dat Wonderlijck murmureren En Narcissus schoonheyt minjoot, 'tHerte van Echo quamen inflammeren, 'tWelck in't prisoen ghevanghen lach in pijne groot,
[Folio I7v]
En hoe Narcissi schoonheyt 'tHert van Echo schoot Met den vyerighen strael van minnen, Waer door Echo viel in zulcken noot, Dat sy van druck niet en wist wat beghinnen, Om troost te winnen. En hoe sy haer Vader heeft ghebeden, Dat hy een Tornoy-spel zoude opstellen, Om dat sy verwecken zoude tot amoureusheden Narcissus de schoonste van alle Ghezellen; En hoe sy Venerem om raet ghinck quellen, Om ontslaghen te zijn van haerder plaghen, En hoe men Venus haer hoorde vertellen, Dat sy haer Lief haren noot zou klaghen, En naer troost vraghen. En hoe sy dede naer Venus vermaen, Als de edel Heeren ten Tornoye quamen, Maer ancxt van weer-zegghen heeft haer opghedaen, Dat 'tverzoeck zou wesen tot haerder blamen, En dat Maechden haer behooren te schamen Tot Ionghelinghen van liefde te spreken; En hoe sy, tot haerder grooter onvramen, Ancxt van weer-zegghen met stoute treken Heeft versteken. Dit zullen wy v al in Rethorijcken Figuerlijck toonen, en Poëtelijck ghewaghen: De zoetheyt die in dit Spel zal blijcken, Zal v allen (hopen wy) wel behaghen, Al die over ons werck niet en klaghen, Wil Godt behoeden van verzeeren: Wist ghy wat jonst wy tot de Konste draghen, Ghy zoudt de Konst door jonste houwen in eeren, En haren lof vermeeren.

Vorige Volgende

De prologhe van het tweede spel.