Emblemata amatoria

Afbeeldinghen van minne. Emblemes d'Amovr

[p. 77]

Sonnet.

De Stralen mijns ghesichts, die'r mengden in de stralen

Van uvve schoonheyts glans, en van u ooghen claer,

VVeerkeerende tot my, soo brachten zy met haer

De vvare beeltenis, dies' onvoorsichtich stalen,

Van't aerdichst, dat Natuyr deed' in u voorhooft malen,

En't vvaerdichst van u gheest, datmen mach lesen daer.

Dees voerdens' in mijn hart, dat voelende 't besvvaer,

Maeckt van de noot een deucht en gaet haer selfs in halen.

Zy maeckten't tot een Kerck daers' als Godin gheeert,

Ghestadigh 'tselve dvvingt, tot vierighe begheert,

Van't gheen dat haer ghelijckt, met heete blicxem koortsen:

Voor Overst van mijn siel daer vverts' erkent alleen:

En van den drangh van mijn ghedachten aenghebeen:

Daer branden tot haer eer duysendt en duysendt toortsen.