Horae Belgicae

[p. 280]

CLXXXIII.
¶ Een nyeu liedeken

EEn meysken leyde een knechtken te voren
Te trouwen naer den Bruycxsen aert
En hi en wilder niet naer hooren
Maer hi deynde al achter waert
Ey ey hi en derf met comen
Ey ey hi is veruaert
Ten eynden soo was hi te vreeden
Hi souse trouwen onghespaert
En doen beefden hem alle zijn leeden
Hoe hebbe ic mi aldus beswaert
Ja, ia, hi en derf niet comen
ia ia hi is veruaert
Alsmen die bruyloft sou gaen houwen
Ende die vrienden waren vergaert
Het meysken sprac ghi moet mi trouwen
En doen craude hi sinen baert
Ey ey hi en derf niet comen
Ey ey hi is veruaert
Die bruyt die is te bedde ghegaen
En sy sprack lief compt herwaert
Doen ghinck hi in een hoeck staen
En hennen toochde sijnen aert
Ja ia hi en derf niet comen
Ja ia hi is veruaert
Hennen soude te bedde waert gaen
Hi sey vroubruyt liegt achter waert
Doen worden zijn oochskens allen traen
Sijn herteken was so seer beswaert
Ey ey hi en derf niet comen
Ey ey hi is veruaert
Hi en wist niet hoet ontlegghen.
Om dat hi sou sijn ghespaert
Jck bidde v willet die kinderen segghen
Dat sijer me gaen ommostaert

[p. 281]

 

Ja ia hi en derf niet comen

 

Ja ia, hi is veruaert