Horae Belgicae

CXXVI.
¶ Van vrou Marie van Bourgoengien

O Felle fortuyne wat hebdy gewracht.
Wat hebt ghi nv bedreuen
Aen een lansvrou van grooter macht
Te Brugghe liet si haer leuen
Cranck auontuer schent menighen man
Goods gracie wil haer bistaen nochtan
God wil haer zijn rijcke gheuen
Och edel prince Maximiliaen
mijn man mijn edel heere
Hier moet een scheyden zijn ghedaen
mijn herte doet mi seere
Ende mijnen natuere wort mi so cranck
O god almachtich lof ende danck
Van deser werelt ick mi nv keere
Oorlof van Ghelre neue reyn
Oorlof mijn heeren alte samen
Eylaces het moet gescheyden zijn
God behoede v allen van blamen
Adieu Philips van Rauensteyn
Adieu van Beueren neue reyn
Ende Simpol hooch van namen
Oorlof mijn lieue nichte soet
Van Ghelre hertoginne
Oorlof mijn reyn Keyserlijck bloet
Dien ic so seer beminne
Tscheyden van v doet mi so wee
Ghi en siet mi leuende nemmermeer
Oorlof alle mijn ghesinne

[p. 192]

5.

Adieu Margrite edel bloeme reyn

 

Mijn liefste dochter bidt voor mi

 

Mijn herte is in grooten weyn

 

Eylaes die doot is mi so bi

 

Het moet doch eens ghestoruen zijn

 

Adieu Philips lieue sone mijn

 

Jck scheyde noch veel te vroech van dijn.

6.

Adieu mijn vrienden altemale

 

Ghi hebt mi redelijc wel ghedient

 

Nv bidde ick v met corter tale

 

Weest doch mijn kinderkens vrient

 

Ende mijnen man wilt doen bistant

 

Ende zijt eendrachtich in v lant

 

Jc hope het wert v noch wel versien

7.

Oorlof lieue man mijn heere

 

God verleene v paeys ende vrede.

 

Jck ben so moede ick en mach niet meere.

 

die doot beroert mi alle mijn lede

 

Adieu Brugghe schoon stede soet

 

God wil v nemen in zijn behoet

 

Daer toe elck lant ende stede.