Logo DBNL
Horae Belgicae (1968)

Horae Belgicae

(1968)–A.H. Hoffmann von Fallersleben–rechtenstatus Auteursrechtelijk beschermd

Vorige Volgende

CI.
¶ Een nyeu liedeken

1.
ICk wil mi gaen verhuegen
 
Verblijden mijnen moet
 
Ende doen na mijn vermoegen
 
Al valtet mi teghenspoet
 
Vrou venus bloet
 
Dat is van dier natueren.
 
Jst quaet ist goet
 
die mint die moet besueren.
2.
Die fiere nachtegale
 
Singt een so huebscen sanck.
 
mocht ic mijn lief betalen
 
Al in haer armkens blanck
 
Sonder bedwanck
 
So soude ic met vruechden leuen.
 
Alle mijn leuen lanck
 
Waer alle myn druc genesen
3.
Reyn lelijcken wt ghelesen
 
doet v ootmoedicheyt
 
Laet mi v dienaer wesen
 
Aensiet mijn bitterheyt
 
Weest wel bereyt.
 
Wilt mi wt minnen ontfanghen
 
Doet mi bescheyt
 
daer na staet myn verlangen
4.
Schoonder rose van minnen.
 
En heb ic noeyt ghesien
 
Si staet int herte van binnen
 
Die schoone van melodien.
 
Wilt tot mi vlien
 
wilt mi wt minnen verwachten
 
doet mi bescheyt
 
Om v dole ick bi nachten
5.
O radt van auontueren
 
Wildy niet omme slaen
 
mach mi geen troost gebueren
 
Dat cost mi menighen traen
 
Laet mi ontfaen
 
Reyn bloeme ghepresen
 
Een troostelijc woort
 
So waer ic gans ghenesen.
6.
Nv hoort ghi ionge gesellen
 
Eer ghi dat minnen begint
 
Vrou venus sal v quellen
 
Met woorden gelijc den wint
 
Eer ghi beghint
 
So hoort na mijn prologen
 
Aensiet dat eynt.
 
So en wordy niet bedrogen.
7.
Die dit liedeken dichte
 
Oft eerstwerf heeft gestelt.
 
Vrou venus was zyn nichte.
 
Met haer was hi ghequelt
 
Sijn vruecht versmelt
 
Hi leeft in groten trueren
 
Daer om hi queelt
 
Si en mach hem niet gebueren

Vorige Volgende