Horae Belgicae

XCIX.
¶ Een nyeu liedeken

JC weet een wtuercoren.
Si staet vaste in minen moet
Na mi en wil si niet hooren
Groot liden ist dat si mi doet
Aen haer weet ic groot letten.
Si doet mi aen groot leyt
Jn alle steden van wetten
doet si mi so cleyn bescheyt
Daer ic eens was willecomen
hieten si mi nv elders gaen.
die blinden oft die stommen
die en hebbens mi niet gedaen
This al bi haren schulden
dat si mi geeft oorlof nv
een ander al waer si root gulden
En kore ic liefken niet voor v
Noch weet ick een dye wt gaet vrijen.
Tis misselijc wat hi brout
seer amoreus is hi bi tijden.
Als hi de alderliefste aenscout.
die liefste waer icse heffe oft legghe.
Der minnen last valt mi te groot
hi en cans haer niet geseggen.
hi is bicans van minnen doot.

[p. 150]

4.

Die poorten ende die mueren

 

die doen mi dicwil groote pyn

 

Nv moet ic altoos trueren.

 

Al om der liefste mijn

 

als een ander gaet dansen ende spelen

 

Ende bedrijuen haer iolijt

 

dan sidt ic thuys en truere.

 

Ende peynsde schoon lieueken. waer dat ghi zijt

5.

Schoon lief v schoon visagie

 

doet mi dicwils na v staen.

 

Jc heb so menighe passagie.

 

Om uwen wille ghegaen.

 

Te water ende te lande

 

Tallen tijden vander nacht.

 

Mijn schoenkens geuult met sande

 

ende die bleuen lacen inden gracht

6.

Hier mede willen wi sluyten

 

Scoon lief onser beyder sanc

 

Jc hope ic sal ghebruycken.

 

Noch eens uwen arme blanc

 

dan is minen wil volcomen

 

Jn al dat myn herte begeert.

 

De liefste en wil ic niet nomen

 

want si is mi .m. gulden weert