Logo DBNL
Horae Belgicae (1968)

Horae Belgicae

(1968)–A.H. Hoffmann von Fallersleben–rechtenstatus Auteursrechtelijk beschermd

Vorige Volgende

LXXXI.
¶ Van Brandenborch

1.
HEt is gheleden iaer ende dach
 
dat Brandenborch geuangen lach
 
Gheworpen in eenen toren
 
Van steenen waren die mueren
2.
Daer lach hi meer dan seuen iaer
 
Sijn hayr was wit zijn baert was grau
 
Sinen rooden mont verbleecken
 
Vander liefste was hi gheweken
3.
Si leyden hem op eenen disch
 
Si sneden hem wt zijn herte frisch
 
Si gauent der liefste teten
 
Tot eene morghen onbijten.
4.
Nv hebbe ick gheten dat herte zijn
 
Daer op wil ghedroncken zijn
 
Nv schenct mi eens te drincken
 
Mijn herte wil mi ontsincken
5.
Den eersten dranc mer die si dranck
 
haer herte in duysent stucken spranck.
 
Nv helpt maria maghet reyn
 
Met uwen kindeken cleyne
6.
Mer die dit liedeken eerstwerf sanc
 
Een vry sluymer was hi ghenaemt
 
hi heuet so wel ghesonghen
 
Vander liefster is hi ghedrongen

Vorige Volgende