Logo DBNL
Horae Belgicae (1968)

Horae Belgicae

(1968)–A.H. Hoffmann von Fallersleben–rechtenstatus Auteursrechtelijk beschermd

Vorige Volgende

LXXIX.
¶ Een nyeu liedeken.

1.
HEt reghende seer ende ick worde nat
 
Bi mijnen boel sliep ick te nacht
 
Bi mijnen boel alleyne.
 
Rijc god mocht ick die liefste zijn.
2.
Hi clopte voor haer cleyn veynsterkijn.
 
Staet op mijn lief ende laet mi in
 
Jc heb hier so langhe ghestanden
 
Mi dunct dat ick verurosen ben.
3.
Dat meysken schoot aen een hemdeken.
 
Si liet in den ruyter fijn
 
Jn haren blancken armen
 
Hiet si den ruyter wellecoem zijn
4.
Mer snachts ontrent der middernacht.
 
Doen gaf die bedsponde eenen crack
 
Ende si weende seere. Si weende also seere,
 
haer docht dat si bedroghen was
5.
En weent niet mijn soete lief
 
Jck sal v schrijuen eenen brief.
 
En trouwen dy Tot eenen wijue,
 
ghi sulter certeyn die liefste zijn.
6.
Ghi ghelooft mi veel, ghi hout mi cleyn
 
Ghi en biedt mi daer toe groot noch cleyn
 
Ende ick draghe een kint Een kindekin also cleyne,
 
ick en weet certeyn den vader niet
7.
Draecht ghi een kint so cleynen kint
 
so siet dat ghi den vader vint
 
Oft gheuet mi Mi oft mijnen gheselle,
 
dat kint dat moet ghehouden zijn
8.
Dat meysken swoer al bi sint Jan
 
Bi mi en sliep noyt ander man.
 
Niet meer dan ghi Dan ghi valsche bedrieger,
 
ghi staet so vaste in mijnen sin.
9.
Die dit liedeken eerstwerf sanck.
 
Dat was een ruyter al vander banck.
 
Ende hi sanghet so fijn Hi heuet wel ghesonghen,
 
by die liefste en mocht hi niet zijn

Vorige Volgende