Horae Belgicae



[pagina 241]
¶ Nr. 120. 1.[regelnummer] Och lieve here, ic heb gheladen mijn sondich schip mit volre last. ic moet doch reisen op u ghenaden ende varen wech alst u ghepast. mijn schip is lec, cranc is mijn mast ende mijn ghewant te gader al, ende ooc heb ic die conde niet, ic en weet niet waer ic hene sal. 2.[regelnummer] Nochtan so moet ic immer voort, als ghijt lieve here ghebiet, want voor waer ic heb ghehoort, dat ic dat mach laten niet. ic en weet niet wat mi is gheschiet. die vaert maect mi mijn hert so swaer, het is mi last ende groot verdriet, dat ic moet voort, ic en weet niet waer. 3.[regelnummer] Leider dus bin ic seer begaen, dat ic van hene trecken moet. die reise moet immer sijn ghedaen, vaer ic behouden dat is mi goet. here, door u waerde heilighe bloet wilt mi beschermen van verdriet, dat ic mach varen in u behoet: waer ic sal havenen, en weet ic niet. 4.[regelnummer] Adieu, adieu, nu wil ic tseil, ic en weet ander gheen niemaren. god gheef mi gheluc ende heil, dat ic behouden doch mach varen. o lieve here, wilt mi bewaren, weest mijn leitsman in mijnre vaert, dat ic mach seilen sonder sparen den wech ten ewighen leven waert. A. 32. - Hs. 1, 6. fehlt al.