Horae Belgicae


¶ Nr. 115. Een suver liedekijn. 1.[regelnummer] Pelghermasie hebbic ghewandert wel drie ende dertich jaer. wanneer die tijt sal comen, ic en weet ooc niet wanneer. waer ic te Jerusalem binnen al in mijns vaders lant! wanneer so sal hi comen, wanneer so wil hi comen, die mi heeft uutghesant?
[pagina 232]
2.[regelnummer] Die crachten mijnre begheerte si sijn ghewont seer groot. die wech hi is seer enghe, tis mijnre sielen doot. der moordenaers isser vele in allen hoeken omtrent. wanneer so sal hi comen, wanneer so wil hi comen, die mi heeft uutghesent? 3.[regelnummer] Mit suchten ende mit carmen so vaer wi over die see. den wint den heb wi teghen, die mast is al ontwee. die anker is wech ghedreven, tschip en heeft gheen profant. wanneer so sal hi comen, wanneer so wil hi comen, die mi heeft uutghesant? 4.[regelnummer] Mijn trouwe heb ic ghebroken, verloren is die rinc; mijn mantelken is versleten, dat ic op der doop ontfinc. nu wil ic mi haestelic wenden ende crighen een suverlic cleet te vallen in mijn brugom, te vallen in mijn brugom, tis mi van herten leet. 5.[regelnummer] Cond ic een herberch crighen, daer ic worde Jesus bruut! dat ghelt der rechter doochden, des gheve ic weinich uut. onder die quade ghesellen, so voede ic mi omtrent. wanneer so sal hi comen, wanneer so wil hi comen, die mi heeft uutghesent? B. 88. - Hs. 3, 4. entwee - 4, 7 u. 8 brughum -?