Logo DBNL
Horae Belgicae (1968)

Horae Belgicae

(1968)–A.H. Hoffmann von Fallersleben–rechtenstatus Auteursrechtelijk beschermd

Vorige Volgende

¶ Nr. 99.
Van Paeschen.

1.
Des morghens vroe bi tiden,
 
een luttel voor den dach,
 
doe quam Maria Magdalena
 
tot onses heren graf.
 
 
2.
Doe si tot sinen grave quam,
 
ende si hem daer niet en vant,
 
den heren dien si sochte,
 
si weende ooc altehant.
 
 
3.
Ende doe si mitten rouwe
 
dus seer al was bevaen,
 
daer vant si enen ackerman
 
in haren weghe staen.
 
 
4.
Wat isset dat ghi soeket,
 
Maria Magdalene? -
 
ic soeke minen heren,
 
Jesus van Nasarene.
 
 
5.
Si hoordet aen sinen woorden
 
ende ooc aen sijnre spraken:
 
sidi dit ghebenedide troost,
 
die mi van sonden heeft verloost?
 
 
6.
Jesus mit uwen brunen oghen,
 
ghi steelt mi mine sinnen.
 
ic wilt Marien claghen,
 
dat ic berovet bin. -
 
 
7.
Claechdi dat mijnre moeder,
 
dat wil ic aen u wreken:
 
ic wil u also doen minnen,
 
u herte sal u tebreken. -
 
 
8.
Breecti mi mijn herte,
 
so nemet mi mine siele,
 
so wil ic mit u wonen,
 
so en schiede mi nie so lieve. -
9.
Die wech is also soete
 
ten hemelrike waert
 
van lelien ende ooc van rosen:
 
mi verlanghet nae der vaert.
 
 
10.
Van lelien ende ooc van rosen
 
ende ooc van akeleien -
 
ende daer heer Jesus wonet,
 
daer bloeijet al van beiden.
 
 
11.
Die wijn is opghesteken,
 
dat vat is opghedaen.
 
daer lopen vijf rivieren:
 
wi willen drinken gaen.
 
 
12.
Die wijn die daer uut vloeijet
 
die is van sulker aert,
 
die doet die droefheit wiken,
 
die ons die vroude ghebaert.

B. 47. - Hs. 1, 2. dagen - 1, 4. graue - 5, 1. hoerdent - 5, 3. syndi (sidi) - 12, 4. geeft (ghebaert).


Vorige Volgende

Over dit hoofdstuk/artikel

lied