Horae Belgicae

¶ Nr. 83.

Wi willen ons blide ende vrolic maken,
truren en mach ons baten niet,
al om te spiten die ons haten
ende om te vermeren haer verdriet.
niet meer van dus, niet meer van so,
saghe ic heer Jesus, so waer ic vro.

Niemant en sal van den anderen quaet clappen,
hi en heeft hem selven wel besien
wat hier voormaels is ghevallen
ende wat hier namaels mach geschien.
niet meer van dus, niet meer van so,
saghe ic heer Jesus, so waer ic vro.

Wi willen ons blide cet.

In allen straten daer wonen niders,
dat mach men wel vermoeden.
daer om en wil ic heer Jesus niet laten,
al souden si alle verwoeden.
niet meer van dus, niet meer van so,
saghe ic heer Jesus, so waer ic vro.

Wi willen ons blide cet.

Wat mach hem schaden dat wi leven,
dien wi schaden niet en costen?
si houden haren mont ende swighen al stille
ende laten ons mit rusten.

[p. 171]

 

niet meer van dus, niet meer van so,

 

saghe ic heer Jesus, so waer ic vro.

 

Wi willen ons blide cet.

 

 

5.

So gaen si in haer haefken lesen,

 

so comen si in den minen.

 

wouden si den haren te gronde uut lesen,

 

si souden daer ghenoech in vinden.

 

niet meer van dus, niet meer van so,

 

saghe ic heer Jesus, so waer ic vro.

 

Wi willen ons blide cet.

 

 

6.

Och als die wint waijet door den oosten

 

ende doet die lover waghen:

 

si en sijn niet al van goeden leven,

 

die langhe cleder draghen.

 

niet meer van dus, niet meer van so,

 

saghe ic heer Jesus, so waer ic vro.

 

Wi willen ons blide cet.

B. 46. - Hs. 4, 2. schaden fehlt.