Horae Belgicae

[p. 100]

¶ Nr. 41.

Dit is die wise
van Henric Strenghen.

Lebinus een edele prince,
verheven so is hi groot,
al om den kerstenghelove
so dede hi wonder groot.

Ende hi is waerlic goet!

o alreliefste vader,

staet ons bi in alre noot!

Uut Enghelant is hi ghecomen
al in dat duutsche lant.
al van den oversten coninc
wert hi aldaer ghesant.

Ende hi is waerlic goet cet.

Mit hem heeft hi ghenomen
dat niewe testament,
ende is daer hen ghetoghen,
daer hem heeft god ghesent.

Ende hi is waerlic goet cet.

Als hi daer is ghecomen,
so hebben si hem versmaet.
mer weinich goeder liede
die volchden sinen raet.

Ende hi is waerlic goet cet.

Haer concilium was aenstaende;
als dat gheworden was,
die oversten ghinghen te rade
op enen ghesetten dach.

Ende hi is waerlic goet cet.

[p. 101]

6.

Lebinus die edele prince

 

quam doe bi hem ghestaen,

 

mit bischopliken ghewade

 

so was hi omghedaen.

 

Ende hi is waerlic goet cet.

 

 

7.

Een cruce had hi ontfanghen

 

in sijnre rechter hant,

 

den ghelove woude hi hem leren

 

ende maken den hem becant.

 

Ende hi is waerlic goet cet.

 

 

8.

Als hi si woude bekeren

 

ende gheven hem goeden raet,

 

doe werden die wrede Sassen

 

van herten also quaet.

 

Ende hi is waerlic goet cet.

 

 

9.

Si werden op hem ontsteken

 

van herten also wreet:

 

si hadden den heilighen vader

 

doe gheerne ghebracht ter doot.

 

Ende hi is waerlic goet cet.

 

 

10.

Mer die heilighe enghel des heren

 

heeft hem van daer ghebracht,

 

dat hare nerghent ene

 

hem doe niet bet en sach.

 

Ende hi is waerlic goet cet.

 

 

11.

Daer nae heeft hi ghelevet

 

so menighe lieve tijt:

 

des waren die goede kersten

 

van herten seer verblijt.

 

Ende hi is waerlic goet cet.

 

 

12.

Goede leer heeft hi ghegheven,

 

sijn exempel was seer groot.

 

daer nae is hi ghestorven

 

van deser werelt doot.

 

Ende hi is waerlic goet cet.

[p. 102]

13.

Tot Jerusalem is hi ghevaren

 

al in dat vaderlant,

 

daer sal hi ewelic bliven,

 

als hem is wel becant.

 

Ende hi is waerlic goet cet.

 

 

14.

Een kerke is hem ghestichtet

 

te Deventer in der stat

 

al op die selve stede,

 

daer hi begraven was.

 

Ende hi is waerlic goet cet.

 

 

15.

Sijn lichaem is verheven

 

al op den hoghen choor.

 

wie dat hem wil versoeken,

 

die mach hem vinden daer.

 

Ende hi is waerlic goet cet.

 

 

16.

O Deventer hoghe veste,

 

hebt altoos goeden moet!

 

Lebinus die heilighe prince

 

staet u bi in alre noot.

 

Ende hi is waerlic goet!

 

o alreliefste vader,

 

staet ons bi in alre noot!

B. 43. - Hs. 1, 1. Lebuynus - 4, 3. lude - 13, 1. Toe - 16, 4. steet.

Vita Sancti Lebuini auctore Hucbaldo monacho S. Amandi in Pertz Mon. T. II. p. 360-364.