Horae Belgicae

¶ Nr. 15.

Dit is die wise:
Puer nobis nascitur.

Ons is gheboren een kindekijn
noch clare dan die sonne,
dat sal ons alle vroude sijn
al totter enghelen wonne.

Die sterren gheven ons lichten schijn
al door den hemel ghedronghen.
Maria die heeft haer lieve kint
mit ganser minnen ghewonnen.

Si lechden in een cribbekijn
mit haren sneewitten handen,
si cusseden voor sijn mondelijn:
des had haer seer verlanghen.

Dat kindekijn speelde der moeder toe
mit sinen cleinen armkens,
het lachede haer also soetelike toe
mit bliden blenkenden oochkens.

Wel di, wel di, joncfrouwelijn,
der soeter weerder stonden,
dattu dat soete kindekijn
mit ganser minnen heefst ghewonnen!

[p. 41]

6.

Nu swighet, nu swighet, mijn kindekijn,

 

mijn god, mijn troost, mijn here!

 

van di so sal ic moeder sijn

 

behouden mijnre eren. Amen.

 

 

7.

Een kint is ons gheboorn,

 

een soon is ons ghegheven.

 

hi heeft versoont sijns vaders toorn,

 

hi brenghet ons int ewighe leven.

 

 

8.

Doe Jesus Cristus gheboren was,

 

ghewonden in armen doeken,

 

daer en was bont noch daer en was grau,

 

hi lach mit bloten voeten.

 

 

9.

Die osse ende ooc dat eselkijn

 

en conden niet ghespreken,

 

doe Jesus in der cribben lach,

 

doe lieten si haer eten.

 

 

10.

Die osse ende ooc dat eselkijn

 

die dreven daer grote feeste,

 

doe Jesus in der cribben lach

 

tuschen tween stommen beesten.

 

 

11.

Die Osse ende ooc dat eselkijn

 

die dreven daer groten wonder,

 

doe Jesus in der cribben lach

 

in cranken doeken ghewonden.

 

 

12.

O et o et gloria!

 

dat soetste van der minnen,

 

dat is Jesus Marien soon:

 

god laten ons ghewinnen!

B. 56. - Hs. 3, 2. sneewitsen - 4, 4. ogekyns - 5, 4. hebt (heefst).