Horae Belgicae

[p. 27]

¶ Nr. 7.
Van den heilighen drie coninghen.

Een kindekijn is ons gheboren
in Bethlehem:
des hadde Herodes toren,
dat scheen aen hem.

Drie coninghen uut Orienten
quamen uut Jerusalem,
si vraechden waer is gheboren
die coninc der joden.
wie saghen in Orienten
die sterre sijn,
wi comen om aentebeden
dat kindekijn.

Een kindekijn cet.

Doe Herodes dat vernam,
dattet kint gheboren was,
hi wert toornich ende gram
ende hi ontsach hem das,
dat hi verliesen soude
sijn rike groot,
hi pensde hoe hi brenghen woude
dat kint ter doot.

Een kindekijn cet.

Herodes vraechde die coninghen,
waer tkint gheboren was.
si seiden: te Bethlehem binnen,
als ons die propheet las:
dat daer comen soude
een heer also groot,
die al die werelt verlossen soude
mit sinen doot.

Een kindekijn cet.

[p. 28]

5.

Herodes sprac den coninghen toe:

 

reist uut ende soeket dat kint

 

mit also groter waerdicheit:

 

men seit, hi is coninc.

 

coninc boven alle coninghen

 

so wil hi sijn.

 

men seit, hi sal besitten

 

dat rike mijn.

 

Een kindekijn cet.

 

 

6.

Als ghi dat kint hebt vonden,

 

keert weder ende secht mi,

 

dat ic in corter stonden

 

mach weten waer dattet si,

 

ic souden also gheern aenbeden,

 

hi is so fijn,

 

hi heeft so seer doorsneden

 

dat herte mijn.

 

Een kindekijn cet.

 

 

7.

Doe die coninghen quamen

 

recht buten Jerusalem,

 

mit vroochden dat si vernamen

 

die sterre staen voor hem.

 

ter tijt doe dat si vonden

 

dat kindekijn

 

in doekerkijn ghewonden

 

bi der moeder sijn.

 

Een kindekijn cet.

 

 

8.

Doe si dat kindekijn vonden,

 

doe wast dertien daghen out;

 

si offerden hem daer ter steden

 

merre, wirooc ende gout

 

mit also groter weerden,

 

het was daer noot:

 

si vonden daer den oversten coninc

 

van haven bloot.

 

Een kindekijn cet.

[p. 29]

9.

Snachts als die coninghen sliepen,

 

die enghel quam tot hem,

 

dat si niet en souden keren

 

weder tot Jerusalem.

 

op enen anderen weghe

 

sijn si ghekeert

 

al in haers vaders rike,

 

als men ons leert.

 

Een kindekijn cet.

 

 

10.

Nu bidden wi den kinde

 

dat Jesus is ghenant,

 

dattet ons allen wil brenghen

 

hier boven int soete lant,

 

daer hem die enghelen singhen

 

tot alre tijt:

 

des gonne ons die hemelsche vader

 

ghebenedijt!

 

Een kindekijn cet.

A. 3. B. 76. - Hs. A. 1, 3. dat heeft H. toren - 2, 6. een sterre schijn - 2, 8. dat soete k. - 3, 7. brenghen soude - 3, 8. dat kindekijn - 5, 1. tot die coninghen - 6, 2. so coomt weder tot mi - 6, 3. dat ic in corten daghen - 6, 5. so mach ic mede aenbeden - 6, 6. dat soete kindekijn - 7, 3. dat si saghen - 7, 4. een sterre die scheen voor hem - 7, 7. in doelkijns gh. - 7, 8, al bi die moeder sijn - 8, 2. dach out - 8, 3. hem mit waerdicheit - 8, 5. so daden si daer alle - 8, 7. den coninc rijc - 9, 8. als men ons heeft gheleert - 10, 2. ghenaemt (ghenant) - 10, 7. dat moet ons allen gonnen - 10, 8. dat kint ghebenedijt. - Hs. B. 3, 6. sijn rike was groot - 3, 7. mochte brenghen - 3, 8. dat kindekijn - 4. fehlt - 5, 5. ende boven (coninc boven) - 5, 6. so is hi fijn - 5, 7. mi dunket (men seit) - 7, 8. bi der liever m.s. - 8, 1. Als dat kint was clene - 8, 2. van dertien daghen olt - 9, 1. fehlt snachts - 9, 2. doe quam die e. tot hem - 9, 7. tot haren conincriken - 10, 3. dat hi ons wil brenghen - 10, 5. loven (singhen).