Print Horae Belgicae(1968)–A.H. Hoffmann von Fallersleben Vorige Volgende ¶ Nr. 203. Der heilige Franciscus. 1. Wi willen heden vrolic sijn op desen hoghen dach met onsen vader Franciscus, die men niet volprisen en mach, want hi is waerlic groot: o heilighe vader Franciscus, staet ons bi in onser noot! 2. Hi dede uit sijn clederen, die hi te draghen plach, hi werpse voor sijns vaders voeten, de werelt was hem een caf. want hi is waerlic groot: o heilighe vader Franciscus, staet ons bi in onser noot! 3. Franciscus sach op sinen voet ghelijc dat doet die pauwe, hi liet sinken sinen hoghen moet ende dede aen die cleder grauwe. want hi is waerlic groot: [p. 358] o heilighe vader Franciscus, staet ons bi in onser noot! 4. Hi is seer goedertieren in sinen ommeganc, sijn hertken bloeit van binnen ghelijc een wijngaertranc. want hi is waerlic groot: o heilighe vader Franciscus, staet ons bi in onser noot! 5. Doen dese heilighe vader dus vast in duechden ghinc, wert hi so vierich in Christus minne dat hi die vijf wonden ontfinc. want hi is waerlic groot: o heilighe vader Franciscus, staet ons bi in onser noot! 6. Hi is seer goedertieren van duechden op aertrijc, van binnen ende ooc van buten so en is niemant sijns ghelijc. want hi is waerlic groot: o heilighe vader Franciscus, staet ons bi in onser noot! 7. Nu is hi op ghevaren hier boven int hemelsche lant, al in dat choor der seraphinnen bi Christus rechter hant. want hi is waerlic groot: o heilighe vader Franciscus, staet ons bi in onser noot! 8. Nu latet ons hem bidden met groter innicheit, dat hi ons wil verwerven die duecht der ootmoedicheit. want hi is waerlic groot: o heilighe vader Franciscus, staet ons bi in onser noot! [p. 359] Liedekens ende Leysenen, Antw. 1539. bl. xva. (Hor. belg. 2, 48). ¶ 2, 4. een caf d.i. gar nichts - 4, 1. 6, 1. goedertieren, liebreich, vgl. Hor. belg. 3, 138 - 8, 4. ootmoedicheit, Demuth. Vorige Volgende