Pest-spieghel

4. Handeling.
4. Wtcomen.

Verkeerde meyning. Sondich bedrijf. Onverduldich.

Sondich bedrijf.

Wy hebben daer immer dien crancken ghenesen

Sy hebben ons ghepresen,

Verkeerde meyning.

En oock wel gheloont.

Sondich bedrijf.

Goy Meesters zijn oock wel waerdich ghecroont

De schyven thoont // hoe veel hebt ghy ontfanghen?

Verkeerde meyning.

De helft hier van ontbeyt sal ick frater langhen,

Speelt niet den bangen, want recht moet recht zijn.

Onverduldicheyt.

Ick moetse groeten, dit wachten doet mijn pijn.

Goeden dach ghy Meesters ofte wyse Heeren
Ick denck dat ick my recht t'uwaerts sal keeren
Ghy zijt doch Medicijns als ick wel mercken mach.

Sondich bedrijf.

Goeden dach lieve dochter, goeden dach,

Laet hooren u gewach // ghy zijt te pas ghecomen,

Verkeerde meyninge.

Voor geenderley sieckte wy ons en schromen
Wy worden aenghenomen // voor Meesters wel bekent
Ick ben de Medicijn die sich tot crancken went
En desen die verbent // de swillingh ende wonden.

Onverduldicheyt.

[fol. Cijr]

 

Ghy zijt dan bey seer wel te ty ghevonden

 

Versuymt geen stonde // maer comt nu stracx met my

 

Mijn Meester sal wesen van u comst soo bly

 

Sijn vrou leyt in de ly // de kinders al te samen

 

Sondich bedrijf.

 

Maer Frater waert niet van noode eer wy daer quamen

 

Met dese te ramen // wat s'ons gheven sullen?

 

Onverduldicheyt.

 

En sorcht niet, mijn Meester sal u die beurs wel vullen

 

En vry sult ghy smullen // jae drincken de Wijn:

 

Verkeerde meyning.

 

Wy volghen u stracx, het sal wel zijn

 

V volck uyt de pijn // wy haest sullen helpen.

 

Onverduldicheyt.

 

O comt dan stracx den commer ons stelpen

 

Ick moete voort, k'en can niet langher staen.

 

Sondich bedrijf.

 

Siet hier comt den Meester selvers aen

 

Laet ons eens hooren wat hy sal segghen.