Const-thoonende juweel

Bij de loflijcke stadt Haerlem, ten versoecke van Trou moet blijcken, in't licht gebracht

Hasersvvouvde.

Op de wijse: Hoe luyde sang de Leeraer opter tinnen.

OOrlof ghy beminders der Redenrijcken,
Die hier tot Haerlem hebt betoont,
By hen daer Trouvv' moet blijcken,
Dat liefd' tot conste in u woont,
Waerom ghy waerdich zijt ghecroont
Met Speelcoorns al ghelijcken.

Liefd' boven al den wijnstock uytghelesen,

Daer van ghy VVijngaert rancken zijt,
Volgt zijn ghebodt in desen,
Om d'Arme t'helpen t'aller tijt,
Sijn hemelvaert ghebenedijt,
Sal u dan salich wesen.

Laet In liefden ghetrouvv' u altijts vinden,

Suyverlick als 'tAngierken vvit,
Wilt u schatten ontbinden,
Tot hulp van die armoedich sit,
Soo noemt u Christ zijn lijf, zijn lit,
Sijn bruyt, jae zijn beminden,

Iae zijn seghen sal u doen In liefd' groeyen,

Dat als d'Orange lely fijn
V huysghesin sal bloeyen,
V wijf, kindren t'allen termijn,
Sullen als Olijf-spruyten zijn,
En u Met vreucht bespoeyen.

Want die met pijn aen 'tcruys sterf hier beneden,

Om den Mensch die in zond' was doot,
Met 'tleven te becleden,
Toonde dat Liefd' moet blijcken groot,
Gaf ons 'sgeests Coorn-aren bloot,
En een ghebodt met reden.

Dat wy d'een d'ander sonder liefd' bewijsen,

'tWelck niet met woorden can gheschien,
Soo daet maer is te prijsen,

[fol. Rrr3v]

 

Dus d'arme jonckheyt wilt aensien,

 

O Rooskens root ghy sult door dien

 

Te heerlicker verrijsen:

 

Want die alhier in 'tbystaen vanden Armen

 

Toonen dat Liefd' es 'tfondament,

 

Sal Godt weder ontfarmen,

 

Afwasschen d'vuyle sond' verblent,

 

Is u dit Acoley bekent,

 

Ontsluyt des liefde armen.

 

Aensiet liefd', die o Akerboomken jeuchdich

 

Rijck was, en arm gheworden is,

 

Om u te rijcken vreuchdich,

 

Dus schaemt u niet aen uwen dis,

 

'tSpijsen zijn arme leden fris,

 

Wildy gheacht zijn deuchdich.

 

Ende al wat ghy doet wilt daer op letten,

 

Dat gheschiet VVt levender jonst,

 

Gheveynstheyt doet besmetten

 

d'Aelmis teghens der liefden gonst,

 

Wilt vvit Lavendel blom vol const,

 

Sulcx in u herte setten.

 

So hebben oyt d'oprechte hier te voren

 

Alle haer doen VVt liefd' bestaen,

 

Lely onder den doren,

 

Wilt oock den selven wech ingaen,

 

Soo sult ghy hooren 'tsoet vermaen,

 

Comt ghy mijn uytvercoren

 

't Wert VVt liefd' versocht van den Heer der Heeren,

 

O Galis bloemkens hier versaemt,

 

Soo't exempel can leeren,

 

Van d'arme Weduw' hooch befaemt,

 

Welcx gift cleyn den Heer hoogher raemt,

 

Dan d'rijcken d'prijs begeeren.

 

Dus moet elc naer macht uyt jonsten begrepen

 

Den Armen doen hulp en bystant,

 

Goudts blom in comst gheslepen,

[fol. Rrr4r]

 

Men eyscht van ons een milde hant,

 

Daer wil en niet naer machte: want

 

'tMoet al gaen onbenepen:

 

Oock die gheeft Met gheneucht can Godt behaghen,

 

Ghy Coorn-blomkens vol consten goet,

 

Wilt naer dees lesse vraghen,

 

Als ghy zit in u overvloet,

 

Bedenckt Christs arme leden soet,

 

Soo sult ghy prijs bejaghen.

 

Wilt oock totten eynde volhardich blijven,

 

In 'tgeen ghy sulcx begint voorwaer,

 

Seghen sal u beclijven,

 

Noyt meerder vreucht als u comt naer

 

Blinckend' als Sonne blommen claer,

 

Sult ghy in vreucht verstijven.

 

Hier med' oorlof, u wil den Prins beraden,

 

Die al zijn vyanden veracht,

 

En verwint door zijn daden,

 

Daerom met ons Aensiet Gods cracht,

 

d'Haselier beveelt met aendacht

 

V in 'sHeeren ghenaden.