Refereyn.
Ghy rijcke die rijc zijt, doet Schriftuere vermaen,
Vertroost den troosteloosen in druc belaen,
Ghy goethertighe haer doch assistentie doet,
Den biddende verhoort, soo u sal worden ghedaen,
Den aencloppende opent uwen schatten seer soet,
Die soeckt laet vinden uwe milde gaven goet,
Op dat ghy moeght ontgaen Gods stranghe Sententie,
Die over den onbarmhertighen recht veerdich gaen moet,
Neemt dit doch ter herten, ende met diligentie
volcompt trouwelijc den aert der Liefden intentie,
Soo wordt deuchtsaem verlangt u leven sterc,
Met een eeuwighe loon, dus doet assistentie
den nootdruftighen ouderdom, alhier in dit perc,
Ten wort niet vergeten u weldadich werc,
Al waert maer een beker waters, 'tis Christus reden,
Hier aen salmen bekennen, zijt ghy leeck oft clerc,
Lieft ghy Christum het hooft, soo troost dan oock zijn leden.
'tGodlijc exempel volght in desen voordachtich naer,
Die inden beginne siet onse Vaders voorwaer
Menichmael ghetroost heeft, soo hy noch doet de zijne,
Met tijtlic voetsel ende decxsel eerbaer,
Ghenoechsaem veertich jaren lanc inder woestyne,
Ende Ioseph in Egypten ghesonden tot dien fyne,
Den kinderen Iacobs een eerlijc vertroosten net,
Dits ooc d'intentie des wets reyne doctryne,
Daer die Liefde des naesten nevens Godt wort gheset,
Die hier in voldoen der Heeren wille en wet,
Die vertroosten den Arm hy zy Heere ofte slave,
Ghelijc 'tvrouken van Sarepta, 'tquam haer te bet,
Want Godt zeghende in overvloet haer cleyne gave,
Elias was mede ghetroost door dienst der rave,
Ons tot navolginghe ten daghe van heden,
Doch goethertighe spaert nu gheenen schat noch have,
Lieft ghy Christum het hooft, soo troost dan oock zijn leden.
| |
Inder deucht beminde doch niet en vercout,
Vertroost uwe leden seer arm en out.
Die anders ancxstich over u mochten claghen,
Den benoochden deelt milde spaert gelt noch gout,
Met sulcken Offer cont ghy uwen Godt behaghen,
Ghelyc Abigael stilt die voorghedreychde plahen
van Davidt, maer vriendelicheyt met reden oorboort
Ghelijc Achimelech troostelijc in voorleden daghen,
Brenght den honrighen uwe thoonbrooden hoort,
Vergaert u een schadt daer gheen dief na spoort,
Inden Hemel door weldaet en deucht onwijckelijc,
Vervullende so de wet Christi inder Liefden accoort,
Verciert u leden in desen met weldaet rijckelijc,
Op dat ghy Ghesegende hoort alle ghelijckelijc,
Comt besidt met vreuchden 'shemelsche steden,
Volght dan voort in sulcke daet publijckelijc,
Lieft ghy Christum het hooft, soo troost oock zijn leden.
d'Arme weeduwe Princen stel ic hier te bedyncken,
Die uyt vierighe Liefde twee pennincxkens quam, schyncken
ons een deuchtsaem exempel om daer nae te leven,
Laet soo mede uwe gaven inde offer-kist syncken,
Want met sulcken Gods-dienst wy den Heere aencleven,
Van onse gaven sal hy mede ghetuychnis gheven,
Inde daghen des oordeels noeyt meerder verlanghen,
Als ghy in eerlijcheyt met den hoofde opgheheven
inde eeuwiche woonstede dan wort ontfanghen,
Want ghy hebt den Honrighen sonder dwanc of pranghen
ghespijst, den dorstighen ghelaeft, gheen water ontseyt,
Den naecten verciert, ende cleederen omghehanghen,
Den ghevanghen vertroost, ende in u herberghe gheleyt
den vreemdelinghen, dus wort u deucht verbreyt
van Christo, want ghy soo volcompt zijn wet en seden,
Wilt ghy dan voor u vinden dees plaetse bereyt,
Lieft ghy Christum het hooft, soo troost dan oock zijn leden.
VVt liefden versocht.
|
|
Auteursrechtvrij