Const-thoonende juweel

Bij de loflijcke stadt Haerlem, ten versoecke van Trou moet blijcken, in't licht gebracht

Rhetorica tot de Lelie van Noortwijck.
Eyschende des Intredes verclaringhe.

AL mach Isidis beelt dragende eesel sijn ooren opsteecken
met de vliech op den disselboom sich pluijmstrijckich smeecken,
Al mach Momus schijndeuchdich met suer stemmich gelaet
dees mijn nutte Contsrijcke feest lasterlijck verspreecken,
off Affjonstich sijn hert eeten door boosen haet,
Ia al mach ons Discordia aendoen seer groot quaet,
so hout doch dees vrees' 'thert so treurich niet bevangen,
Off 'tgeen ghy Lelitgen onder den doorn, VV liefde bestaet,
trect my tot meerder vreucht, dies bluscht doch mijn hert verlangen
voleynt dijn werc, en weest seer vrintlijck van my ontfangen.