Memorieboek der stad Ghent van 't jaar 1301 tot 1793. Deel 3

1585.

Item, het is te wetene dat op den x^en van Meye, volghens de commissie Caroline, de wet, zoo dezelve hier vooren staet, by commissarissen al ghecontinueert was, zoo dat de zelve alhier verdreghen zijn om cortheyt te schryvene, midts datter gheen veranderinghe inne en is.

Item, den xxx^en Meye, op Assenwoensdaech, was binnen deser stede omme de voorgaende victorie ghedreghen eene schoone processie generael, danof de vergaderinghe was t' Sente Jans ende insghelijcx de dienst.

Item, ontrent desen tijt quamen zeer corts d'een naer den anderen onder de reductie ende reconciliatie by appointement onder de conincklyke majesteyt de stadt van Bruessele ende Mechelen.

Item, die van Antwerpen deden daghelijckx haerlieden uterste ende extreme debvoir met alle practijcken ende behendicheyt, zoo met brandschepen als anderssints, omme de brugghe tot Calloo omverre te werpen; ende op eenen tijt, een brandtschip de brugghe ghenakende ende weerckende, wierp door de fortse van de steenen, die daerinne laghen ghetast ende ghemetst, onder met tonnen buscruyt, een eynde van de brugghe om verre. Daer bleven vele edele, ende andere soldaten, ende onder andere de marquys, wesende vicomte de Gandt ende senechal van Doornicke, dewelcke van den slach in 't water was gheworpen ende versmoorde, daer Zyne Hoocheyt zeer drouve omme was; het maecte zoo groot

[p. 100]

gheluyt als of de weerelt daer ontrent vergaen hadde; maer door de goede diligentie van zyne voorseyde hoocheyt, zoo wiert de brugghe voorgenoempt weder zeer haest ghesloten.

Den 1^en Ougst quam uut Zeelandt ghelost jeghens Mons. de la Noue, mijn heere de grave van Egmondt; ende mijn heere Champaingny met noch andere edelen reden hem teghen, ende corts daer naer, des anderdaeghs, reysde hy, gheaccompaingneert met den voornoemden Champaigny, naer den leghere alwaer zyne hoocheit was.

Item, die van Antwerpen ziende de stercke belegherynghe van haerlieder stadt, ende dat hemlieden gheen secours en volchde, zonden naer Beveren in de voornoemde maendt van Ougste de heere van Aldegonde, haerlieder burchmeestere, met noch meer andere notablen ende ghedeputeerden naer Bevere aen Zyne Hoocheit, omme te tracterene van payse; ende immers met over en weder te reysene, wierdt endelinghe 't voorseyt tractaet ghesloten, ende quam oock de voorseide stadt onder de ghehoorsaemheit van Zyne Majesteyt.

Den xxvij^en Augusti, 's avons ten seven uren, luydden alle de clocken van Gendt eene ure lanck.

Item, corts naer 't voorseide overcommen van de zelve stede ende 't garnisoen van Zyne Hoocheyt daer binnen wesende, is zyne voorschrevene hoochheit ghereyst binnen de voornoemde stadt omme aldaer ordre te stellene, alwaer hy zeer eerlick ende met grooter triumphen ontfanghen was.

Item, dit jaer zoo was 't eenen zeer cauden wintere, zulcx dat in veel jaren niet ghesien en heeft gheweest langhe durende; het sneeude dry continueele weken, niet eenen dach noch nacht falende.

Den v^en October was eenen meestere Jacob Hessele, raedt

[p. 101]

's conincx van zynen rade in Vlaenderen, buyten de Petercellepoorte ghevonden, ende aldaer ghevonden geheel ende gans, daer hy zeven jaren begraven hadde gheleghen, naer dat hy met noch een ander persoon, ghenaempt Visch, aldaer aen eenen boom ghehanghen was; 't welck dede eenen Ryhove in de troublen of geusentijt, zonder recht, wet ofte justicie daer over te gebruyckene; hy was met zeer solempnele processien begraven met xxxij tortsen; daer ginghen mede myne heeren van den Rade in Vlaenderen, metten advocaten ende procureurs, schepenen van beede de bancken, ende daer over wiert ghedaen een schoon costelijck uutfaert in Ste. Michielskercke.

Den xix^en Lauwe xv^clxxxvi braken uter vanghenesse van den Gravencasteele Anthone Heyman ende M^r Lucas Maeyaert, wesende twee van de zes mannen die de prince van Parme in de reconciliatie deser stede t' hemwaerts reserveerde; zy hadden de sleutels van de zelve vanghenesse doen contrefaicten, daermede zy hemlieden uuthilpen, ende des anderdaeghs waren zy op ghelt ghestelt, te weten elck op vijf hondert guldens.

Item, corts daer naer waren zy by trompette, by huyssier ende commissie tot drye distincte stonden inghedaecht.

Den xxviij^en dede de smet, die de sleutels ghecontrefaict hadde daermede de voorgenoemde ghevanghenen uutghebroken waren, amende met eene tortse in zijn lijnwaet, midts dat hy hem grootelicx wiste t'excuserene.

Den xj^en dach van April, wesende vrindach, was by den hoogbailliu van Nevele ghedaen verberrenen zekeren jonghen man, die in 't jaer xv^c twee en tachentich zynen eyghen oom vermoort hadde.