|
| |
1549.
Commissarissen.
| Mer Adriaen de Croy, grave van Reux. |
| Guillaume de Waelwijc, ontfangher van Oost Vlaenderen, voor mynen heere van Praet. |
| Mer Jaques de Croy, heere van Sampy. |
| Mer Hugues de Grammes, heere van Winghene. |
| Schepenen van der Kuere. |
Schepenen van Ghedeele. |
| |
| Jan de Vos, ruddere. |
Meester Joos van Grijsperre. |
| Jan Salaert, ruddere. |
Jacob Vrient. |
| Meester Joos de Grutere. |
Loys van Morslede. |
| Pieter Cortewille. |
Willem van Lake. |
| Lievin van Sicleers, fs Willems. |
Jan de Grutere, fs Mer Gyselbrecht. |
| Meester Jan de Stercke. |
|
| Lievin Cluetrijn. |
Lievin Dhooghe. |
| Gillis Diericx. |
Adriaen de Wale. |
| Loys Hueribloc. |
Simon Yoens. |
| Jacob Goetghebuer. |
Gillis van der Beke. |
| Jan de Buck, fs Pieters. |
Jan Dhertoghe, d'aude. |
| Pauwels van den Velde. |
Jan de Suttere, fs Andries. |
| Michiel Dhooghe. |
Lievin van der Stichele, fs Bavins. |
| |
Pieter de Mey. |
Ontfanghers.
| Joos Donaes, bouchoudere. |
| Philips Vrient, van de wercke. |
| Jan Baert, van der Yssuwe. |
| |
| |
Item, in dit jaer voornoemd, tusschen Paesschen ende Syncxenen, begonst men te Ghent groote ghereescepe te maeckene van temmeragien, die men ter blyder incompste ende ontfanghe van den jonghen prince, die men te Ghent verwachtende was; de welcke binnen Ghent quam den xiiijen in Hoeymaent, ende syne intreye dede, ende was saterdaechs achternoens, ten welcken tyde dat hem groote eere bewesen was, als sulc eenen prince wel betaemde.
Item, jeghens den prinche sijn uut Ghent ghereden, minheere de hoochbailliu met die van der wet, ende hebben hem blydelic willecomme gheheeten buuten, daer de Dendermondschepoorte plach te stane, by eender muelene, die staet voor een groot pachthof met twee gemetste pylaren, dwelc staet in 't ghesceet van der heerlichede van Desselberghen, toebehoorende den prelaet van Sente Pieters ende der heerelichede van Sente Baefs.
Item, noch es jeghens den prince ghereden menich edel man, poorters uut der stede van Ghent, alle ghecleet in 't swart fluweel met eene witte plume op 't hooft, die den prince convoeyhierden tot synen hove, dwelc eenen scoonen hoop was alle eens ghecleet.
Item, de prince, commende voor 't Nieuwe Casteel, soo was ter eeren van hem afghescooten alle de artielgerye, dwelc groot gheluut maecte ende vreemt om hooren.
Item, ter poorte van den Steendamme lach ghemaect eenen ruese seer groot van vormen, ende voor de poorte was ghestelt de figuere van der stede, te wetene eene scoene jonghe maecht met eenen witten leeu up haren scoet.
Item, de prince vant in 't ghemoete alle de gheestelicke processie van der geheelder stede t'sijnder blyde incomste.
| |
| |
Item, daer stonden om den prince te willecomen vier prelaten, seer heerlic gheabitueert met huerlieder costelicke myters op haerlieder hooft, te wetene: minheere van Sente Pieters, minheere van Sente Baefs, minheere van Baudeloo ende minheere van Dronghene, daer hem minheere van Ste Baefs te voete viel ende gaf hem te cussene een gulden cruuse, dwelc de prince seer mindelic custe ende reet bet voort naer sijn hof.
Item, daer waren ghemaect vijf costelicke poorten, daer de prince duer passeerde, te wetene: eene op den Steendam, eene op de Hoochpoort by den Arent, eene op 's Gravenbrugghe, eene by der Gheltmunte, ende eene by den hove van den prince, daer alleomme ende te noch vele andere plaetsen retorijckelic vertoocht was hoe dat de aude edele voorsaten haerlieder rijcke overgaven in hueren levene, als Davit dede croonen Salemon, synen soone, ende van Baudewin Apkin, ooc sijn lant overgaf in synen levene den goeden grave Kaerle, ende meer andere seer wel in propooste dienende, dwelc seer wel vertoocht waert.
Item, daer stonden over beede syden van der straten van der poorte daer de prince inne quam tot synen hove, vj oft viij voeten verscheeden, jonghe maechdekins, staende op stuepeelkins van der erden verheven; dwelcke hadden anne een roet rocxken ende daer over een kerspen mantelkin met den hanghenden haere, haudende elc eene tortse berrende in de hant, daer sy mede willecomden Philips van Oostenrijcke, daer hy goede ghenouchte inne nam, ende was seer scoon om te siene, want daer groote menichte in ghetale waren.
Item, 's anderdaechs quamen ooc binnen Ghent beede de
| |
| |
coninginnen, te wetene van Vranckerijcke, ende van Hongheryen ende Bohemen, beede susters van Onsen Keysere, ende moeyen van onsen prince, ende hemlieden was de selve tryomphe bewesen ende betoocht die 's daechs te vooren den prince betoocht was.
Item, de K.M. quam ooc inne op den selven dach binnen der stede van Ghent ter Keiserpoorte, voor de noene, met cleenen state, ende was in sijn hof eer iemant vele daer af wiste.
Item, daer quam ooc binnen Ghent 's maendaechs de hertoghe van Sassen, die den Keysere ende sijn Hof volchde als ghevanghen man, ende was ghelogieert ten huuse van Simoen van Cuelsbrouc, bailliu van den mannen van Sente Pieters; ontrent den huuse van den voornoemden bailliu van de mannen waren vele Spangaerden ende Duutschen.
Item, den xvijen in Hoeymaent, 's avons spade, es de prince uutghereden met cleenen state buten Sente Pieters neffens Ghent; daer lettel iemant van der stede af wiste, ende es gaen slapen up een huus van plaeysantien, naer d'aude costume; 't huus was ghenaempt Puttenhove, toebehoorende joncker Jan de Duernaghele, heere van Vrooylant, dwelc was nieuwichede; want der edele voorsaten ghewoonte was te slapene te Swijnaerde, up 't casteel van minheere den prelaet van Sente Pieters.
Item, 's anderdaechs, ende was woonsdach, den xviijen in Hoeymaent, quam de prince met scoenen state binnen Sente Pieters ter Petercellepoorte inne, daer hem jeghens quam minheere van Ste. Baefs, minheere van Baudeloo ende minheere van Dronghene, ende alle de gheestelicke processie van der stede van Ghent binnen den voornoemden durpe van Sente
| |
| |
Pieters; ende de prinche es also ghecommen tot Spriete, ende alsoo Onse Vrouwestrate uppe tot up 't Stalhof by den cloostere van Sente Pieters, daer hem te ghemoete quam minheere de prelaet van Sente Pieters ende alle de religieusen van den voornoemden cloostere, daer de prince van den peerde beette te voet voor den prelaet, ende gaf hem te cussene een costelic gauden cruuse, verciert met meneghen dierbaren steen, ende de prince knielde voor een stapel ende custe den missael, in teeken van obedientie, ende es also ghegaen ende gheconvoeihiert met der processie van den cloostere, gaende tusschen den prelaet ende den prioer tot in de kercke, daer van stonden an ghedaen waert een scoon ghesonghen messe, die de voornoemde prelaet celebreerde, die de prince hoorende was, sittende in een scoon oratorie; ende de messe ghedaen sijnde, es de prince gheknielt up de trappen van den hooghen autaer, ende heer Gheeraert van Cuelsbrouc, prelaet voornoemd, guerdde den prince anne een gulden sweert, ende daer naer es de prince upghestaen ende ghegaen an den hooghen autaer voornoemd, ende heeft daer gheleit sijn vyngheren op 't heleghe evangelie ende beswooren de rechten, vryheden, lyberteyten van der kercke van Sente Pieters voornoemd, welcken eet ludende was aldus:
‘Ego Philippus, Dei gratia, princeps Ispaniarum, utriusque Sicilie, Hierusalem, etc., archidux Austriae, dux Borgundiae, etc, comes Hausburgi et Flandrie, promitto et juro quod in adventu meo et successione hujus patrie et comitatus Flandrie conservabo, tanquam bonus, fidelis et supremus guardianus sive advocatus et conservator immediatus bene et fideliter contra et erga cunctos omnia, privilegia, libertates, franchisias, usus, consuetudines, bona, possessiones,
| |
| |
personas, subditos et familiares hujus ecclesie Sancti Petri in Monte Blandinio à predecessoribus meis fundate; ita me Deus adjuvet et omnes sancti quorum corpora hîc quiescunt et omnes sancti paradisii.’
Item, den eet dus ghedaen sijnde, was ghereet een costelic banket op de abdie, daer groote costelichede ghedaen was.
Item, naer 't voornoemde bancket es de prince ghereden ter stedewaert inne naer sente Janskercke, daer de selve prince de clocke track ende beswoer de Heleghe Kercke.
Item, van sente Janskercke es de prince ghereden op de Vrydachmaert, daer hy beswooren heeft dlant van Vlaenderen ende de stede van Ghent, ende daer naer heeft hem 't ghemeente van Ghent ooc beswooren ende eet ghedaen, ende ten selven tyde was daer op de Vrydachmaert ghelt ghesayt van gaude ende van selvere, ende de voorscepenen van der Kuere, Jan de Vos, was daer op de maert van den prince riddere ghesleghen, ende 's anderdachs was groote tryomphe bedreven te Ghent op den Cautere, ende 's avonts was bereet een costelic banket op 't Scepenhuus, daer de keysere, de prince ende beede de coninginnen ten bancketten waren.
Item, binnen twee daghen daer naer, track de keyserlicke Majesteit, de prince ende beide de coninginnen besien de nieuwe vaert, die by die van Ghent ghedolven was, ende voeren te scepe tot an den lantdijc van der see, daer men 't heet op 't Sas.
Item, van op 't Sas voornoemt es de M. ende de prince, metsgaders beede de coninginnen ghereist naer Brugghe, daer de prinche van ghelijcken syne intreye dede.
|
|
Auteursrechtvrij