Memorieboek der stad Ghent van 't jaar 1301 tot 1793. Deel 2

1517.

Commissarissen.

Mer Lievin van Pottelsberghe, ruddere, in de stede van minen heere van Fiennes.

Mijn heere de prelaet van Sente Bertins, t' Ste. Omaers.

Mijn heere Claeys Utenhove, president van Vlaenderen, in de stede van minen heere de Lalaing.

Mijn heere de prelaet van St. Winoxberghe, in de stede van minen heere van Castre, souverain van Vlaenderen.

[p. 40]

's Heeren kiesers.	Der stede kiesers.
Meester Reynier Salart.	Amant Claeys.
Meester Fransoys de Brune.	Joos Martins.
Joes de Grutere.	Jacob de Vettere, deken van der Weverie.
Dominicus van Provijn.
	Jan de Sterke.
Schepenen van der Kuere.	Schepenen van Ghedeele.
Mer Philips de Grutere, ruddere.	Roeland de Baenst.
	Christoffels van den Hove.
Claude Goedghebuer.	Jan de Brune.
Pieter Braem.	Lievin Borluut.
Fransoeys van den Brande.	Symoen Meeussone.
Jan van Wijchuus.	Martin de Vettere.
Wulfaert Snibbele.	Jan Passcharis.
Christoffels de Wintere.	Joris van Overwale.
Jan Rijckaert.	Willem van der Muelene.
Gillis Danins.	Laureins Claeis.
Joes de Cleerc.	Heynric van den Somple.
Jan de Stuvere.	Pieter van Wettere.
Joos van Hukelghem.	Pauwels Dhamere.
Jan Symoens, smet.
Heuverdeken.	Deken van de Weverie.
Heynric van Testele.	Jacob de Vettere.

Item, den xxij in Ougste, quamen binnen der stede twee ballinghen by daghe, ghenaempt Lievin Ghuus ende Pieter Leys, ende worden van den bailliu ende dieners vervolcht, zoo dat Lievin Ghuus waende duer de Leye swemmen t'Eckerghem ende hy verdronck. Pieter Leys was achterhaelt te Afsne buuten Ghent ende gevangen, maer Lievin Ghuus doot zijnde, was op een scavaut op Sente Verhildenplaetse, op eenen Sondach, gherecht met den sweerde naer de costume.

[p. 41]

[Item, in dit jaer wiert afghebrocken d'audde sale van den Schepenhuyse. (K.M.)

- Item, in dit jaer was de kalsyde geleegt voor het Schepenhuys, by den raed van twee vremde meesters, die men doen nam omme 't besorgen van den wercken, de welcke men toeleyde elck xxvij Philips-guldens t' jaers, ende eenen Philippus 's daeghs, als sy in de stede sijn om het besorghen van den wercke. (K.M.)

- Jan van Dixmude wilde den xxix^en December dootslaen Jacob van Melle, cleerck van den bloede, ende was er omme gewesen in 's Ammans, up den Nieu-avont, dwelck hy niet en dede, ende wasser up den xiij avont omme gebannen, ende was de leste ballynck van der thune. (Pr. Ar.^B.)

- Item, in dit jaer begonst Martinus Luther ende veel diergelijcke haer leeringhe te saeyen ende te schryven. (K.M.)

- Item, in dit jaer soo was 't eenen grooten winter, dat men ginck t' Antwerpen ter Borght over de Schelde; ende in Seelant reet men met wagenen ende peerden, ende quam alsoo overe in Brabant. (K.M.)

- Item, in dit jaer ende in de maend van Februarius soo fondeerde de Predicheeren t' Antwerpen het portael van haerlieder nieuwe kercke. (K.M.)

- Dweerck van den Scepenhuuse was eerst begonnen by eenen Jan Stassins, ende saude dweerck dat buten staet binnen gestaen hebben, ende de solders sauden geweest hebben vaulten; doe quam eenen Justaes Polleyt ende dede al 't begonnen weerck afbreken ende de straten nederen, so men nu sien mach, ende waren toesienders Jan van Wijckhuus ende Heindrick van Testele, nopende de weercken. (Pr. Ar.^B.)]

Item, in dit jaer, up den viij Septembris, vertrac coninc

[p. 42]

Kaerle met Leonora naer Spaengien ende arriverde den xix der selver maent in 't lant van Asturien, in de stede ghenaempt Vylencusosa (Villaviciosa).

[In dit jaer vertrock de coninck Carolus (uut Wacheren. S.B.) naer Spaignen, vergeseltschapt met Eleonora, syne suster, ende arriveerde den 19 van February in de haven van de stadt van Viciosa, in 't lant van Asturie, in welcke reyse een schip verginck, in het welcke waren de secretaris van den coninck. In de maent van April naervolgende, arriveerde uyt Spaigne tot Ghendt, don Ferdinand, broeder van den coninck, met de hertoginne van Savoye. (K.M.) Zie 't jaer 1518.

- In de maendt van Hoymaent was gevangen Mer Clays, hoochrechter van der stede, ende men souden gebrocht hebben ter scheerper examen, dwelck gelaten was uut zekere cause. (Pr. Ar.^B.)

- Daer was een jonck man geheeten Clays van der Sickelen, barbier van zynen ambachte, wonende up de Vrindachmaert in de Bessemmaerct, welcken Clays committeerde up Maria-Maechdeleenendach eenen manslach, zijnde geheel droncke, ende was, 't faict gedaen hebbende, subijt gevanghen ende 's anderdaechs geexamineert ende by de exemple die men hem zeyde, kende 't faict gedaen t' hebbene, present scepenen. Op dien tijt hadde de voornoemde M^r Clays eenen cnape, de welcke ontboden was by scepenen, ende hem wart gevraecht ofte hy hebben wilde 't officie van zynen meester, daer uppe dat hy andtwoorde ja, ende men dede hem eedt doen, ende daer naer was hem geseyt dat hy gereeschepe saude gaen maken, omme tsachternoens den voornoemden Clays van der Sickelen te executeren up de Hoofbrugghe, dwelck hy beloofde te doene; daer naer

[p. 43]

gynck men de vierschaere bannen, ende was de voornoemde Clays verwesen te stervene. De nieuwe aengenomen t' huus commende en zeyde niet van zynen eede, nemende up zynen hals eene geladene wel gestoffeert, ende track t' Ender Weerelt over, ende also ter stede ute. 's Achternoens naer costume quamen scepenen te 's Gravensteene, ende daer was last gegeven te gaen besiene oft er al bereet was, ende men bracht in andtworde datter de executeur niet en was, zo dat de officiers doe gingen in 't Sausselet halen den voornoemden M^r Clays, omme zijn officie te doen, die 't selve refuseerde ende ontseyde, seggende dat hy zelve bereet was omme sterven ende anderssins niet en verwachte, so dat by tusschenspreken ende belofte, die de hoochbailliu, onderbailliu ende scepenen hem deden te doen, hebben kennis van het stick by hem gecommitteert, hem daer af leverende contract in handen, onderteekent en geseghelt by hemlieden, ende 't selve gedaen zijnde dede 't officie up de Hooftbrugghe naer costume. (Pr. Ar.^B.)]

Item, in dit jaer op den Scurssen Wonsdach, was ghereformert 't clooster van den Augustynen van der duutscher oordene.

Item, in dit jaer overleet heer Gillis Boele, abt van Sente Baefs, ende wart abt in zyne plaetse heer Lievin Huughenoot.

Item, in dit voornoemde jaer overleet den vij Wedemaent heer Jan van der Cauderburch, abt van Sente Pieters, ende wart abt in zyne plaetse heer Gheeraert van Cuelsbrouck.

Item, in 't zelve jaer overleet mijn heere van Fynes, Jacob van Lutsenburch, ende staerf den xij in Hoeymaent te Ghent, ende light begraven t' Sotteghem.

[p. 44]

[In dit jaer overleet de auden heere van Finis, waer af men de uutvaert dede ende haudende was in Ste. Janskercke, daer bescreven waren de staten van den lande, geestelick ende weerlick; de welcke alle vergaderden t' Sente Michiels, daer hemlieden vonden de heeren van den rade, met huerlieder supposten, de scepenen van beede bancken, met huerlieder state, beede de dekenen metten andere dekenen, mette geswornen, al gecleet in 't swarte; insgelijx alle de processen van der stede, de welcke t' samen gynghen metten lijcke tot Sente Janskercke, ende alle de poorteren mede: Aldereerst so quamen, naer de processie ende de staten voorgenompt, acht persoonen, elc persoon dragende eenen standaert met zyne wapene ende eerlichede, twee heerraulten met wapenrox, die reden te peerde; daer waren twee peerden vooren ende achter den lichame, daer niemant up en sat, de welcke gestoffeert waren met lakene van damast, geluwe vooren ende bachten root, up huerlieder hooft hebbende elc eene plume ende metten wapene behangen zeer costelick; insghelijx waren daer twee hellemen gedragen met plumen, met twee schilden ende eenen wapenrock voor dlijck; insghelijx 't Gulden Vlies up een cussen van fluweele; daer naer bracht men 't lijck ghevoert up een horsbaer, gedect met een gulden cruuce dwelck cleet vier persoonen hilden, elc an eenen cant jeghens 't slepen; daer naer volchde zijn zone te peerde ende andere persoonen van oordene M^r Joos van Lalaing; daer waren ij^c tortsen, de welcke gedregen waren by twee hondert aerme persoonen ende elc eenen raukeerle hadden zy metten capproen, ende als den dienst ghedaen was voerde men 't lijck naer Sotteghem, daer 't begraven es; de heere van Resseghem

[p. 45]

voerdeghe het hellemet ende de oordene van het toysoene. (Pr. Ar.^B.)]