Memorieboek der stad Ghent van 't jaar 1301 tot 1793. Deel 1

1497.

's Heeren kiesers.	Der stede kiesers.
Arent van Grijspeere.	Philips Symoens.
Christoffels Vijt.	Luuc Minne.
Olivier de Cleerc.	Jooris van Keercvoorde.
Jacob du Buisson.	Lievin Utermeere.
Schepenen van der Kuere.	Schepenen van Ghedeele.
Claeys van den Moure.	Joos Triest.
Joos van Melle.	Boudijn van der Donct.
Symoen de Voghele.	Claeys van den Eechaute.
Lievin van Leyns.	Jacob Fransman.
Jacob van der Eecken, scipman.	Lodewijck van Marke.
Jan van Wijchuus.	Roelant de Baenst.

[p. 371]

Sanders van Vaernewijc, heere van Bost.	Meester Roeland Zoete.
	Jacob Boudins.
Willem Leys.	Jan de Scermere.
Wouter Mestdach.	Jan van Loo, f^s Adriaens.
Pieter Leeman.	Lievin de Vechtere.
Heyndric van Leeuwen.	Jan de Peystere.
Jacob de Grave, hudevetter.
Pieter Martins.
Heuverdeken.	Deken van de Weverie.
Jan Hueribloc, smet.	Daneel Goetghebuer.

Item, in dit jaer was de banc van scepenen ommeghekeert, want die ghecoren waren scepenen van der Kuere waren by de commissarissen ghestelt scepenen van Ghedeele, ende de scepenen van Ghedeele waren ghestelt scepenen van der Kuere, ende also verandert.

[Dese voorscrevene jaerscare waren naer 't overbringhen van den kiesers verandert by den commissarissen ons gheduchten heeren de bovenscreven bancken, te wetene: de onderbanck by den kiesers overbrocht als raed of scepenen van Ghedeele was ghestelt boven ende ghemaect scepenen van der Kuere, ende de upperbanc was ghestelt beneden als scepenen van Ghedeele. (S.B.)

- Item, in dit jaer waren by commissarissen de weth die boven staet beneden ghestelt, om dat de kiesers ter liefde van den prince eenighe in de wet niet stellen en wilden. (K.M.)]

Item, in dit jaer begeerde hetoghe Philips up dlant van Vlaenderen vj^cxx^m croonen, te vier scellinghen grooten 't stic.

Item, in dit jaer was gheconsenteert de vrye maert te Halfvastenen xiiij daghen lanc gheduerende.

[p. 372]

Item, in dit jaer overleet coninc Kaerle van Vranckerijcke, de zone van coninc Lodewijc, ende Lodewijc, hertoghe van Orliens, waert coninc van Vranckerijcke.

Item, in dit jaer, up den Beloken Paesdach na de noene, viel ende brack de draeyende brugghe, daer men gaet over de Scelde naer Sente Baefscloostere, ende daer verdranc vele volcx in 't watere (wel xxvij lieden. Pr. Ar.^B.) ende daer waerter vele ghevist; endelinghe waerter ghevist eene vrauwe die swaer ghinc van kinde, alle de daghe te gheligghene, de gheselnede van Daneel Praet, ende ghevist zijnde ghelach terstondt van haren kinde, ende 't kint waert ghenaempt Daneel, de welcke men naermaels langhe ende vele jaren noemde Neelken Praet, ende was simpel ghebooren, ende bleef simpel tot zijnder doot, ende waert een aut man.

Item, in dit jaer waert vrauwe Margriete weduwe van den zoone van den coninc van Spaengen, ende traude daernaer den hertoghe van Savoeyen.

Item, in dit jaer was de Witte Roose ghevanghen in Inghelant.

[In dit jaer wart te Londen in Ynghelandt gherecht de Witte Roose, omme dat hy hemlieden gheerne ghemaect hadde conynck van Ynghelant. (Pr. Ar.^B.)]

Item, in dit jaer dede bisscop Quick zyne intreye te Brugghe, ende waert daer gheconsacreert ende ghewijt den v in April.

Item, in dit jaer was by colatien ghevraecht ter begheerte van hertoghe Philips, ende hem 't selve gheconsenteert te wesene binnen der stede van Ghent een scietspel van den voetboghe ter begheerte van hertoghe Philips.

[p. 373]

[In dit scependom was binnen dezer stede een rijckelick schietspel, daer af dat die van Berghen in Henegauwe den upperprijs wonnen, den welcken was zes zelveren cannen. (Pr. Ar.^B.)]

Item, den vj Hoeimaent gaf men de ghemeente te kennen dat de stede van Ghent t' achter was xix^mvj^cxl. p. gr. diversche rentiers, ende dat boven den renten van den lande van Vlaenderen.

Item, als den grave van Vlaenderen gheconsenteert es up dlant van Vlaenderen hondert duusent cronen, dan es de stede van Ghent portie zes hondert pont grooten.

[In dit jaer begonst men te maken de brugghe achter 's Princhenhof. (Pr. Ar.^B.)]