Memorieboek der stad Ghent van 't jaar 1301 tot 1793. Deel 1

1472.

Commissarissen.

Mijnheere van Sente Baefs.

Mijnheere meester Guillame de Clungny, protonotaire du Sainct Siège apostolique.

M^e Thomaes Maled, raed.

Christoffels Buridaen, ontfanghere.

M^e Guillame Haultam, secretaire.

Schepenen van der Kuere.	Schepenen van Ghedeele.
by commissarissen zonder kiesers.
Jan Utenhove, f^s Jacobs.	Gillis Utenhove.
Jan van den Poucke.	Jan van den Poele, temmerman.
Symoen Borluut, f^s Symoens.	Jan van den Eede.
Joos van Melle, f^s Jans.	Fransoeys van Loo.
Lievin Sersymoens.	Daneel van Landuut.
Claeys van Munte.	Joos Passcharis.
Laureyns de Loose.	Justaes Roelins.
Jacob Mannins.	Pieter de Grave.
Fransoeys van den Velde.	Jan Maeldraey.
Hughe van Gramez.	Jan van Huerne.
Jacob Cauweric.	Martin de Kempe.

[p. 284]

Gyselbrecht van Teteghem.	Heynric de Brune, brauwere.
Willem Lammins.	Arend van der Straten, brauwere.
Heuverdeken.	Deken van de Weverie.
Lievin de Meestere.	Justaes Danneels.

Item, in dit jaer ende scependom hilt grave Kaerle zyne fieste van den toyssoene van Valenciene.

Item, in dit jaer de keysere Frederic, ten versoucke van den heere van Egghemont an den hertoghe Kaerle van Borgondien de commissie hebbende ende maecten rechtere in de zaeke tusschen den hertoghe Arnaut van Gheldere ende Adolf van Cleven zynen zoone, ende de hertoghe Kaerle dede zoo vele an Adolf van Cleven dat hy zynen vader Arnaut uter vanghenesse ontslaen zaude, die Adolf acht jaren lanck hadde ghevanghen ghehauden, ende dese Adolf sprac zeer spytelicke woorden in de presentie van hertoghe Kaerle, zo dat hy daer omme ghehauden wert; maer hy ontreet heymelic zijnder eede, ende quam tot Namen ende waende daer te scepe sitten; maer hy waert bekent van zynen weert, zoo dat hy waert ghevanghen ende wederbrocht by den hertoghe Kaerle, ende hy dede hem vaste legghen te Vilvoerde, daer hy by nachte uutbrack, ende van daer was hy brocht te Curterijcke in 't casteel, ende lach daer ghevanghen.

Item, de hertoghe Kaerle van Borgondie benaut metter waerhede dat hertoghe Arnaut ende Adolf, zijn sone, dlant van Gheldere t' onrechte besaten, als commen zijnde van der joncxter dochtere, ende dat de hertoghe van Ghulcken was commen van der autster dochtere, ende ooc dat hem by keyserlicke vonnesse inne ghewijst was.

[p. 285]

Item, hertoghe Kaerle heeft ghecocht 't recht van den hertoghe van Ghulcken omme lxxx^m gauden guldens, die hy daer vooren betaelde ende ghegheven heeft, ooc zeyde men dat de hertoghe Arnaut Adolf zijn zoone onterfde, ende hertoghe Kaerle zijn recht overgaf midts de quaethede van Adolf, zynen zoone, die te Curterijcke ghevanghen lach ende bleef ligghende dleven van hertoghe Kaerle totten jare lxxvj, also hier naer volcht.

[In dit jaer ghynck 't bestandt ute dat voor Amyens ghemaect was, ende hertoghe Caerle track over de Somme ende wan de stede Nyelles, Roye, Mondedier, Dierpas, Sainte Walix, Nieucasteel, ende hy dede verbranden wel twee duusent dorpen, ende doe wasser weder een nieu bestandt ghemaect van twee jaren; want de conynck van Vranckerijcke en quam nievers te weere, ende in 't zelve jaer was ghesien een sterre met een steerte. (Pr. Ar.^B.)

- Item, in 't selve jaer ontrent Sente Agneetendach in Lauwe soo sach men in de lucht eene allervreeselijcke comete die duerde lang tot by Paesschen, ende was soo vlammich met eenen breeden langhen steert by nachte lichtende als de mane. (K.M.)]