Memorieboek der stad Ghent van 't jaar 1301 tot 1793. Deel 1

1437.

's Heeren kiesers.	Der stede kiesers.
Mer Heyndrick van der Camere.	Pieter Huribloc.
	Pieter Solleberch.
Mer Gillis van Grammene.	Jacob van den Hane.
Gheerem Borluut.	Lievin de Cleerck.
Hoste van de Wale.
Schepenen van der Kuere.	Schepenen van Ghedeele.
Pieter Sersymoens.	Jacob van Ravenschoot.
Jan van Lembeke.	Roberecht van Meerendre.
Nicasis de Bels.	Lievin de Pottere.
Philips Sersanders.	Ywein van Vaernewijc.
Rogier Temmerman.	Race Colpaert.
Jan de Cooman.	Eloy Baert, over hem Gillis Meerenzone.
Pieter Pype.
Claeys de Smet.	Lievin Zoetamijs.
Christoffels de Grave.	Jan de Coninc, op de Mude.
Jooris van Melle.	Heynderie Boengaert.
Lauwereyns van der Eecken.	Jacob Maes.
Claeys Pehaert, over hem Geeraert de Brune.	Jan Solleberch.
	Jan Kriekesteen.
Michiel van Zele.	Olivier Pouestrate.
Heuverdeken.	Deken van de Weverie.
Jacob van den Hane.	Pieter van der Eeken.

[p. 205]

Item, in dit jaer, ontrent Bamesse, rees eene groote wapeninge binnen Ghent, ende stelden hemlieden in partyen, de neiringhe van de Smeden met die hemlieden volchden, ende omme beters wille volchden hemlieden alle de andere neiringhen ende trocken van der maert ter Waelporten ute, ligghende op de Rietgracht, daer ontboden waren de Casselryen, ende binnen dier tijt waren sesse ghesellen onthooft zonder wet ofte vonnesse.

Item, van daer trac men tot Erdenburch daer zeker personen onthooft waren, ende in 't wederkeeren rees tusschen de Casselrye ende die van Ghent een groot remoer zoo datter eenen grooten quantenteit doot bleef ende vele ghequetst; dit gebeurde t' Eekeloo.

[In dit jaer was eene wapenynghe te Ghendt tusschen die van Brugghe ende die van Sluus omme sommich gheschil dat tusschen hemlieden was, ende die van Ghendt trocken ute up eenen sondach ende ghynghen ligghen te Mariekercke ende van daer trocken zy t' Erdenburch; ende als zy xv daghen t' Erdenburch gheleghen hadden, ende by hemlieden hadden diversche persoonen van Brugghe ghevanghen, zoo zauden zy upbreken ende lieten de ghevanghene gaen, binnen welcken tyde quamen uut Brugghe Willem de Keteleere, Clays Boye, elc met eenen cnape, ende brochten eenen brief an Pieter Sersymoens, de welcke den brief overlas in de presentie van veel notable mannen, ende ghelesen zijnde 's avonts met lichte, waren de voornoemde persoonen ghebracht up een schavaut ende aldaer onthooft. Daer naer trocken zy naer Eecloo; daer zijnde reesser een ghevecht onder de weverie, ende rees een wapenynghe daer de casselrien vromelick uut quamen ende schoten doot Jacob Cames, vry

[p. 206]

schipmakere ende brauwere, en doen quamen zy naer huus.

Op dezen tijt reysden de scepenen ende de neerynghen naer Brugghe, den xx July, ende die van Ghent raden die van Brugghe dat zy lichten sauden huerlieder syegneur die lagh voor Sluus, dwelcke zy deden. Die van Ghendt baden die van Brugghe dat zy zauden willen pays maken metten prinche, omme dat de coopmanschepe sauden moghen ganck hebben binnen Vlaenderen, ende die van Brugghe begheerden t' hebben haerlieder previlegie, die zy hadden voer hemlieden jeghen die van Sluus, ende die van den Vryen, dwelck de Brugghelinghen vulquamen.

Dit previlegie oversien hebbende gaven die van Sluus en 't Vrye onghelijck, ende trocken daer omme by den prinche, ende baden hem dat hy 't lant van Vlaenderen saude willen paysieren ende in coopmanschepe stellen, vry varen ende vry keren.

Op dezen tijt de prinche stelde veel capiteynen ende mannen uut Picardien, omme die van Brugghe te belettene huerlieder vitaelge, dwelcke die van Ghendt gheware werdende, ontboden die van Ypere ende andtworden 't selve jeghens den prinche, segghende, dat van gheenen noode en was vremt volck te nemene omme dlandt te regierene; ende de prinche schiet van zijnder opinie. (Pr. Ar.^B.)

- Item, in 't selve jaer soo was groot ghevecht te Brugghe daer de heere van Lelyadam bleef, ende die van Brugghe stonden ter maert van Sente Bertholomeus-daghe tot Sente Donaes-daghe, welcke was vij weken ende iij daghen, dat sy niet gevrocht en hadden, sonder backers, brauwers, vleeschauwers, viscoopers, enz. (K.M.)]

Item, in dit jaer was groot ghevecht te Brugghe, daer de

[p. 207]

grave Philips moeste op de Vrydachmaert vlien weder ter poorten ute met cleenen ghetalle van volcke, ende ontvloot met grooten ghelucke, ende daer bleef doot de heere van Lelyadam voor S^te Juliaenscapelle, ende was een vroom capitein. Hy hadde drye waerf Parijs ghewonnen, ende die van Brugghe en wisten anders niet dan dat de keyser op Hollant was; dit ghebuerde woensdach in de Syncxen-daghe, daer de grave Philips quam ter Bouveryepoorte inne, 's achternoens ten iij ueren, ende waende also Brugghe vechtender hant te winnene ende inne te nemene; maer hy moeste vlien naer de poorte die ghesloten was, ende zy wert open ghedaen ende ghesmeten; dat dede doen Jacob van Ardoeye, hooftman van de schabelotters, ende de zelve was te Brugghe omme de zelve cause onthooft.

[In dit jaer was't eenen dieren tijdt dat men het mudde coorens cochte zes ponden grooten, dat was elc halstre x sch. gr., ende de backers en wilden niet backen, zoo dat scepenen de neerynghe open stelden, ende dat elc backen saude die wilde. (Pr. Ar.^B.)

-In dit jaer t' Alder-heleghenmesse maecte de grave van Vlaenderen pays metten Oosterlyngen, ende den zelven pays seghelden de vier leden 's lants. (Pr. Ar.^B.)

-In dit zelve jaer den xxviij^en van Juny gaf hertoghe Philips de stede van Ghendt privilegie, ter causen van 't ontschaecken van jonghe dochters. (Pr. Ar.^B.).