Eerste bouck van beschryfvinghe van alle gheschiedenesse (1562-1572)
(1978)–Augustyn van Hermelghem–
Auteursrechtelijk beschermdXXIX
| |
[pagina 130]
| |
vostre argent!’. Et luy prendant sa couroye avecq sa tasse, en laquelle estoit son argent, portant quatre solz de gros, luy prenant et ostant aussy par-dessus ce son chappeau et luy baillant ung aultre chappeau, estant fort ensanglanté (lequel, comme ledict déposant a depuis entendu) estoit le chappeau qu'ils avoient osté à l'une des personnes qu'ils avoient meurdry, certain tamps auparavant à Roesbrughe; prendant aussy les livres de luy parlant, qu'ils bruslèrent au feu en sa maison et en sa présence, boutant en après ledit parlant forciblement hors de sa maison et, d'illecq, le menans sur la tere dudict Dranoutre, auquel lieu il fut rencontré d'un personnage, nommé Daniel de Coninck, natif de Steenvorde, fils de François de Coninck, estans présentemens détenu prisonnier à Cassel, à raison des troubles de la nouvelle religion, lequel dressa et présentit contre ledict déposant sa harquebuse, se présentant devant luy et menaçant de en tirer à travers de luy, disant: ‘Vous, pape, vous avez trahy mon père et le faict constituer prisonnier, il faut que vous soyez pendu’. Laquelle hacquebuse, ledict déposant, à raison qu'elle estoit fort près de luy, aueroit débouté son bras. A raison de quoy, ledit Daniel de Coninck, aueroit frappé de ladite hacquebuse sur la teste de luy [129], deposant, de sorte qu'il en seroit sorty du sang.
Et, après ce, ledit sang aueroit coulé tant sur le cimetière que en l'église en grand abondance, en laquelle église ledit déposant fut mené par lesdits garnemens, là où il aueroit trouvé le curé de la paroisse de Reneghelst, estans prisonniers, estant ledit curé logié et restrainct par ses paroichez. Et ont, par après, tiré sus le crucifix avecq les cordes de cloches, qu'ils ont brûlé en ladicte église avecq une partie des plus sobres habits et aornemens et mirent aux feux le saint-sacrement de l'autel, duquel ils se bavèrent et raillèrent, usans tels mots: ‘Regardez et voyez quel miracle vostre Dieu scait faire!’. Et retindrent, par après, le ciboire, laquelle estoit doré sur les bordz avecq trois calices, deux tasses d'argent et les ornemens coustables et pietiénant si comme cela estant de velours casures et telles semblables et [...] ledict acharnemens, estant arrivée jusque au nombre de trente six.
Et, estant ce que dessus faict et achevé, le dessusdict nombre s'est distrait et retiré d'illecq soubz la conduite d'ung joene homme, eagié de plus de trente ans, estans de moyenne stature, bleud de visage et n'ayant gerre de barbe, avecq yeulx bichans et non agu, parlant bon langage thiois, que l'on disoit illecq estre un gentilhomme, surnommé Heulle, et estoit aussy, lors en la mesme compagnie, Jean Michiel, prédicant, estoient semblablement lesdits trois prestres et l'ung qui parle, en sortans dudict Dranoultre commander de porter les fardeaux des biens que lesdicts violeurs d'église avoient desrobé et pillé ès églises de Reneghelst, Lokere et Dranoutre, disant, oultre, que ladicte compagnie est arrivée dudit Dranoutre en la paroisse de Quemelles, envyrons les douses heures au midy, là où avecq forche et violence, ils constraindirent le coustre dudit lieu aller quérir les clefs et faire ouverture de l'église, rompans, brisans, spolians et bruslans audict lieu les images, messels, livres, fonds, ornemens | |
[pagina 131]
| |
et touttes aultres choses, qu'ils trouvoient servant à la décoration de ladite église, horsmis ce qui estoit d'argent ou de velours, ce qu'ils auroient emporté avecq eulx. A quel lieu seroit venu certain personnaige d'homme, ayant [129 Vo] bien peu de barbe, eaigé environ de 30, lequel lesdicts garnements bien rechuerent et leur versa de la bierre qu'ils aueroient payé. Et avoient incontinent eulx retirez d'illecq jusque à Neuf-Eglise, là où ils furent bien ung quart d'heure devant l'église, auparavant qu'ils y seussent entrer, parce que le constreise tenoit en secret. Et, cependant, lesdicts mauvais garnemens avoient advironné toute la cimetière de leur harquebuses et allèrent aulcuns d'iceulx en la maison du bailly dudict Neuf-Eglise, lequel lors n'estoit en sadite maison, hors de laquelle, mais ils avoient emporté les armoires et bastons de deffense et, finablement fut ladicte église ouverte des clefs d'icelle, en laquelle église lesdites violences aueroient fait semblables desroberies, pilleries et brullement, comme ils avoient faict audict Dranoutre et Quemmele et par-dessus ce aueroient estez aussy sur la tour de ladicte église, hors de laquelle tour, ils aueroient portée en bas plusieurs bastons et adornemans d'icelle église et, entre aultre, une chappe de bleu velour et ne appercheut, il quy parle, aulcunement que aulcune personne des habitans dudict lieu de Neuf-Eglise euist empeschement, saulf ung homme seul, lequel aussy fut incontinent frappé d'une hacquebuse sur le corps, estant auprès du lieu où pend pour enseigne l'eschequier et par ce moyen celuy qui tenoit en garde les prestres prisonniers, quy estoit ung parmentier de Honschote, surnommé petit à petit, crya à haulte voix que l'on tuast tous ceulx, quy bailleroient quelque empeschement.
Et, ayans séjournez audict lieu de Neuf-Eglise par l'espace d'ung heure ou environ, durant leur besoigne et aultrement se seroient retirez d'illecq, allant vers Impkercke, avec lesquels seroient lors encoires suivies six hommes, desquels, comme le déposant entendit, que les trois estoient dudict lieu de Neuf-Eglise et des aultres trois l'ung d'iceulx, leur officier criminel, qui estoit ung françois, lequel se disoit avoir esté bourreau en la ville de Assenburch, au pays de Westphalie et feirent à luy déposant et pareillement aux trois aultres prestres porter les fardeaux comme cydevant est dict, de sorte que, environs les cincq heures, ils seroient [130] arrivez audit Impkercke, auquel lieu, entendant qu'il avoit sept soldatz de Lille, aulcuns de leur compagnie aueroient hastivement courru après lesdits sauldats, néantmoins que lesdits sauldarts s'estoient mis en deffences auprès de certaine grange, ils seroient retourné et venus vers le ‘grand host’ audict Impkercke, auquel lieu ils avoient semblablement tout rompus, bruslé et dérobé, et, par-dessus ce, prins prisonnier ung sergeant officier de justice, à raison de que aultrefois, en exerceant son office, il aueroit aidé et assisté de prendre prisonnier aulcuns héréticques, lequel néantmoins se seroit eschappé et prins la fuyte, estant sur la place dudit lieu.
Déposant plus oultre, estant la rompture et brisement de l'église faicte audict Impkercke, ils se seroient retirez d'illecq, jusque au mi-chemin de | |
[pagina 132]
| |
Neuf-Eglise, et illecq auroient prins ung aultre chemin, à ung costé, allans et traversans, parmy bois, pretz, sayes et buissons, jusques au temps, qu'ils seroient arrivéez auprez d'une grande cense, en laquelle ils ne entrèrent et, estans illecq, sans eulx bougier feirent mectre à ung costé d'eulx leursdits prisonniers estant debout et prindrent conseil et advis entre eulx environ le temps d'une demie heure, ce que estant achevé seroit venu au trot, ledit gentilhomme que l'on nommoit Heule avecq ledit prédicant Jean Michiel disant que lesdicts quatre prestres prisonniers debveront estre mis à mort et, partant, qu'ils avisassent de eulx à ce préparer et dire leur confiteor et oraison, sur quoy lesdicts prisonniers dirent qu'ils n'avoient aulcunement offensé, demandant à ceste cause la raison pour laquelle ils deveroient mourir. Sur quoy leur fut respondu par ledit Jean Michiel, prédicant, qu'ils avoient à passé ung an donné la vie audit trois prestres de Reneghest et pour cause que par après, ils avoient continué de livrer le peuple à la justice, qu'il convient qu'ils fussent mis à mort, comme aussy debvoit faire ledit déposant à raison qu'il estoit seurement idolatre, sievant quoy lesdicts prisonniers dirent leur confiteor en latin, dont lesdits maulvais garnemens se prinrent à rire et galer et les ayant mené encore [130 Vo] ung demie lieu plus avant, ils les ont diverses fois admonestez de dire leur confiteor et encoire aultrefois leur feirent semblables admonitions, estans sur une montaigne entre Neuf-Eglises, auprès du moullin d'eauwe, y estant et auprès d'un petit cabaret et furent sy avans le lesdicts prisonniers par huict personnes prints en la totale compagnie, menez de ladite montaigne en ungne vallée, disans par lesdicts huicts personnes ausdits prisonniers, qu'il convenoit qu'ils fussent mis à mort (sans néantmoins leur déclarer de quelle sorte de mort) pour cause que la volonté de leur capitaine est ascavoir ledict surnommé Heulle estoit telle. Et que de ce faire, ils en avoient chargé de la part du prince de Condé et furent aussy sievant ce le deposant et les trois prestres ordonnez de eulx mectre à genoux.
Et, estans mis à genoulx, ils ont à iceulx despouillé tous leurs habillemens et prins leurs chemises, reservé les habillements de luy déposant à raison qu'il estoit enthièrement ensanglanté par ses playes, qu'il avoit la matinée précédente receu de sa teste, ce qui seroit advenu environ les unze heures en la nuict, faisant une bien grande clarté de la lune et se mist le dessusdit curé de Reneghest à genoux devant luy déposant et par le bourreaux fut frappé bien deux doigt de profond de son hastidau et par après fust par ledict boureau perché avecq une dague d'alleman et encoires samblablement d'une hallebarde par ung aultre personnage et finablement fust encoire frappé par derrière par le josne homme de Neuf-Eglise, le nom duquel luy est incognu et aussy par ung aultre de Reneghest, estant de son stil carpentier, comme il disoit, lequel le frappit d'une hapieste. Et semblable, par après, furent les deux aultres prestres chapelain de Reneghest, estans illecq à genoux mis à mort et meurdrit, et comme le troisiesme meurtre seroit advenu et que ledit parlant attendoit seullement le cop de la mort, ilz aueroit au mesme instant esté retirée arrière par | |
[pagina 133]
| |
l'ung desdicts huicts personnages, nommé Hans Cammerlinck, lequel commanda audit bourreau et aux aultres de non faire aulcun mal ou grief à luy déposant, en disant alors par ledict Hans Camerlinck audit parlant: ‘Je vous aye donné la vie, il ne vous arrivera ny faict aulcun grief là où je seray présent partout, ayez mémoire de moy!’. Et ce faict, fust commandé audit déposant de oster les chausses à l'ung de ceulx quy furent mis à mort, ce que il luy fust lors nécessaire de faire.
Et fut d'illecq par ledit surnommé Camerlinck mené sur ladite montagne, oyant que l'on rua et meist les corps mors en ung fosset et d'illecq sont venu audit petit cabaret lez noir mollin, là où le prédicant seroit venu avec le capitaine et estoient environ 36 hommes en nombre, estans les autres aller arrière pour faire le guet et fut déclairé par ledit Camerlinck et predicant, qu'ils avoient donné la vie audit déposant, sur quoy ledit prédicant déclara aussy tels mots: ‘Je scavoye bien, qu'il ne seroit poinct mis à mort, car nous ne le congnoissons poinct, il ne a esté que tant seullement l'espace de six ou sept mois pasteur, au moyen de quoy s'il veut aller en Angleterre auprès de nos frères, nous en ferons ung homme de bien!’. Ayant, aussi, lors par ledit prédicant proposé et déclairé à luy déposant plusieurs et diverses argumens d'escripture, quy estoient hereticques et entre aultres soustenu et maintenu, que sievant la doctrine de l'escripture saincte, au XXIIIe chap. de Izechiël. Les dessus nommez prestres estoient à bon droict mis à mort et aulx aultres couppeys les orreilles, disant que ledit surnommé Heulle aueroient déclairé, qu'il estoit homme de fief du seigneur de Vendeville, au Westquartier.
......
Ainsy atteste le jour que dessus, en la ville d'Ypre, en la présence de Jean van Lichtervelde, escuyer, seigneur de Beaurevracht, advoé, et Gille de Corte, greffier de ladite ville d'Ypre. Tesmoing cette signe. Ainsy soubsigné de Corte. |
|