Rymkronyk van Jan van Heelu betreffende den slag van Woeringen van het jaer 1288

CCXVII. 18 avril 1284.

Nous Jehans, par le grace Diu dus de Lothier et de Brabant, faizons à savor à tous ceaus ki ces presentes lettres verront et oront, ke Nos avons mis et estavli receveur de toutes no rentes de Braibant Wautier Volcart, nostre chevalier, et avons mis en ses mains tout ce qui venra de no cens, de no rentes, en deniers, en bleis, en capons, en gelines, de nos iawes¹, de nos bos², de notre monoie, de nos lumbars, de nos juis³, et tous les pourfis et les escheances ki Nous venront, en quel maniere ke ce soit, en toute nostre terre; et quant k'il en fera, pour no pourfit, no le tenons ferm et estavle, et quant k'il levera du nostre, et mertera (sic) pour Nous ades à bon conte, et à loal, sans mal engien. Et li denons plain pooir, k'il puist doneir de nostre, pour nos besongnes, où il li plaira et li sanlera, ke l'on soit pour nostre pourfit; et s'il avoit cous ou damages pour Nous, No li devons rendre et paier, si avant k'il les pora monstreir, à bon conte. El s'il avenoit k'il fut plus chargiés pour Nous, ke les parties devant dites en sa recepte ne montaissent, Nous ne le poriens ne devriens osteir, ne nule de ces parties devant dites mettre hors de ses mains, duques adonc k'il fust delivrés, sans damages, et aquiteis entirement, de Nous ou de nos hoirs. En tesmoignage des quels coses Nous avons ces lettres saellées de nostre scael, et prions et requerons nobles hommes, nos chiers feables, Godefroi de Braibant, nostre frere, Henri de Louvanz, segneur de Harstall, nostre couzin, Woutier Bertaut, seigneur de Malines, et Woutier Bertaut, nostre couzin, sin ainsnei, k'il y pendent les leuz saiaus, awec le nostre. Et Nos, Godefroi de Braibant, sires de Arscot et de Virzon, et li autre deseur nommei, à le priere et le requeste nostre chier seigneur le duc, avons pendu nos saiaus, awec le sien, à ces lettres, en tesmoignage de veritei. Donné en l'an de le incarnation nostre seigneur mil CC. quatrevis et quatre, le mardi apres close Paske.

[Folio xii, verso.]

1 Iawes, eaux.

2 Bos, bois.

3 Juis, juifs.