Rymkronyk van Jan van Heelu betreffende den slag van Woeringen van het jaer 1288

CXCI. 9 juin 1292.

Lettres de Jean, duc de Brabant, portant quittance de 5600 livres tournois, reçus du comte de Flandre pour la duchesse de Limbourg, et pour Arnoud, le jeune seigneur de Julermont et de Mulrepas.

Nous Jehans, par le gracie de Dieu dus de Lother, de Brabant et de Lembourgh, faisons savoir à tous, ke comme Nous, pour Nous, pour noble dame le ducesse de Lembourgh, le seconde feme dou duc de Lembourg, ki fu pour mon sengneur Ernoul le jovene de Julermont de vint et trois cens marcs, contenues en une lettre, pau plus u pau moins, et de toutes autres dettes k'il demande, et puet demander, et pour Mulrepas, par lettres et par raisons, de vive vois et par tesmoingnages, fuissiens demandans à noble homme, no chier cousin, Renaud conte de Ghelre, pluseurs dettes de diverses manieres, et diverses occoisons, Nous, de toutes les dettes ke pour Nous ke pour ceaus devant dis, ke Nous u cil devant dit peuissiens demander, par quelconques raison ke ce fust, jusques au jour de le datte de cestre lettre, au devant dit conte de Ghelre, le devant dit conte de Ghelre, pour Nous et pour ceaus devant dis, quitons, lui, et ses hoirs, pour Nous et pour nos hoirs, et pour ceaus devant dis, et pour leur hoirs, et recognissons ke Nous, pour toutes les dettes, ke demandeit avons au conte de Ghelre, pour Nous et ou nom de ceaus devant dis, avons rechuet de noble homme nostre chier sengneur et pere Guion, conte de Flandres et marchis de Namur, pour le devant dit conte de Ghelre, cienc mile et cienc cens livres de tournois, en maniere de prest, cest à savoir, se nos chiers cousins me sire Williames de Mortaingnes, sires de Rumeis et de Dossemer, et Jehans sires de Kuic, nos foiaules, en cui Nous sommes plainement assenti et demoreit

[p. 558]

de toutes les demandes des dettes devant dites, oijes les raisons d'une part et d'antre, et nomeement le frait, ki courre doit, sour ces cienc mil et cienc cens livres, ki emprunté sunt à usures, rewardent et dient ke Nous, pour toutes les demandes des dettes devant dites, ke pour Nous, ke pour ceaus devant dis, en cui nom Nous les avons demandeit, ne doions mie tant avoir comme le somme des cienc mil et cienc cens livres porte, ke Nous à noble homme nostre chier sengneur et pere, le conte de Flandres devant dit, renderons et rendre deveront, et à ce Nous obligons, Nous et tout le nostre, tous les deniers ki demourront des cienc mil et cienc cens livres devant dis, deseure ledit mon sengneur Williame de Mortaingne, et dou sengneur de Kuyc, devant dis; et s'il avenist ke mesire Williames de Mortaingne, et li sires de Kuyk, devant dit, oijes les raisons d'une part et d'autre, si comme deseure est dit, rewardaissent et desissent ke plus deuissiens avoir, ke li somme des deniers deseure dite ne porte, cel sourplus Nous doit rendre et payer li cuens de Ghelre devant dis. Et est à savoir ke Nous nos avons estaublit et estaublissons warant et respondant, pour les devant dis noble dame le ducesse de Lembourgh, mon sengneur Ernoul de Julermont et Mulrepas, envers noble homme le conte de Ghelre devant dit, ke Nous, de toutes les dettes ke li devant dit ducesse, cil de Julermont et Mulrepas, ont demandeit à lui, u puissent demander, jusques au jour devant dit, u Nous par eaus, fust par lettres, u par autre raison, le dit conte de Ghelre quittons, et tenuons quitte, entierement et sans damage, à tous jours. Et avons encore enconvent et promettons, loialement, à rendre as devant dis mon sengneur Williame de Mortaingne, et le sengneur de Kuyc, au jour k'il diront leur dit, des choses devant dites, toutes les lettres ke Nous avons, pour Nous et pour ceaus devant dis, des dettes devant dites; et se jamais apres aucunes lettres fuissent retrouvées, ke Nous rendut n'euissiens mie, Nous volons k'eles soient de nule valeur, et de nule viertu, et i renonchons plainement. En tesmoignage de toutes ces choses devant dites, Nous avons ces presentes lettres fait saieler de nostre saiel, ki furent faites et données en l'an de gracie mil deus cens quatrevins et douze, le premier diemence apres le Trinitée.

L'original, muni du sceau du duc, aux archives Flandre, à Lille.