Rymkronyk van Jan van Heelu betreffende den slag van Woeringen van het jaer 1288

[p. 540]

CLXXXI. 7 novembre 1291.

Alliance entre Gui, comte de Flamdre, et Jean, duc de Brabant, et promesse par ce dernier d'aider son beau-père, contre le comte de Hollande.

Nous Guis, cuens de Flandres et marchis de Namur, et Nous Jehans, par la grace de Diu duc de Lothier, de Brabant et de Lymburgh, ses fius, faisons savoir à tous, ke pour che que Nous et cascuns de Nous soions plus poissans de Nous et des nos accroistre et maintenir en choses à no honeur, à nostre hiretaghe et nos droits apertenans, et ke chil ki adversitei nous vauroient, se doient plus douter d'enprendre et de maintenir chose ki Nous fust contraire, et en soient mains poissant, Nous, par grant conseil tout soit il ensi, ke par aleanche de mariage, dont si comme il plaist à Diu bele generations est issue, et par autres raisons pluseurs, soions tenut d'amer et d'avanchier l'un l'autre, avons fait especialment aleanche et confederation, en le forme et en le maniere ki s'ensuit, c'est à savoir, ke en toutes les besoinges à honeur ou à hyretaghe, apertenans soit à ore, soit en apres, Nous aiderons, conseillerons, et conforterons loialment l'un l'autre, à armes et sans armes, par ost et par chevauchie, ensi comme chius de Nous, ki besoing en ara, en requerra l'autre, par lui ou par ses letres, ou par ses messages soffisans; et s'il avient ke aucuns de Nous fait aiuwe à l'autre par host, che sera sans le frait de celui qui on aidera, et se on fait aiuwe par chevauchie, chis qui on aidera pourverra et estoffera le chevauchie à son frait, depuis ke li chevauchie istera de le terre al aideur, duskes adone k'elle i sera rentrèe, et chis de Nous ki requerra aiuwe à l'autre de que besoinghe k'il ait à faire a fait, k'il en requerra sera tenus de faire son serement k'il requiert l'aiuwe pour juste cause et droituriere, et loialment à son ensient, et li autres l'en doit croire par tant à son seremaint, et lui aidier sour chou, ensi ke deseure est dit. Ceste aleanche durra tant comme Nous vivrons et Nous l'avons promise par nos fois, l'uns à l'autre, et par nos seremains ke Nous avons fait solempnement sour les sains ewangilles, touchiés de nos mains; et avons mis hors de eeste aleanche tres haus signeurs et nobles le roi de France, le roi d'Alemaingne et Ie roi d'Engleterre. Et pour ce ke pour le volentei et le consentement le conte de Hollande, et à se requeste, Nous, dus de Brabant devant dis, fumes obligié à estre avoec le conte de Flandre et ses hoirs, encontre ledit conte de Hollande, pour aemplir, warder et maintenir le pais et l'ordenanche, ki a este fait par ledit conte de Flandre, et par Nous duc devant nomei, et par le comte de Naviers¹, nost chier frere, Nous volons de tant comme apertient à ledite pais et à l'ordenanche, tenir audevant dit conte de Flandre et à ses hoirs nos convenanches, et ke ceste aleanche s'estende à chou et as coses ki de chou aront occasion, et quant as autres choses, Nous metons ledit conte de Hollande hors de ceste aleanche; et Nous, cuens de Flandre, metons hors de ceste aleanche no neveut de Dampiere, et no neveut Henrit de Lucellebourgh, et prometons, sour le serament devantdit, ke s'il i avoit discorde entre le duc et eaus, Nous i metriens le pais ê no poir et al honeur le duc devant dit; et Nous dus devant dis metons hors de ceste aleanche le conte d'Artois, le conte de Saint-Pol, et ses

1 Nevers.

[p. 541]

freres, et prometons, sour le serement devant dit, ke se il i avoit descorde, entre le conte de Flandre et eaus. Nous i mettriens le pais à no poir et al honeur le conte de Flandre devant dit. Et pour ce ke Nous volons ke ceste cose et ceste aleanche soit ferme et estable, avons Nous ces presentes letres saielées de nos propres saieaus, ki furent donées et faites en l'an del incarnation Nostre Signeur mil deus cens quatre vins onze, le merkerdi apres le fieste de Tous Sains.

L'original au dépôt dss archives, à Lille.