Rymkronyk van Jan van Heelu betreffende den slag van Woeringen van het jaer 1288

[p. 446]

LXXVI. 27 février 1287.

Lettres de Renaud, comte de Gueldre, par lesquelles il permet à son beaupère Gui, comte de Flandre, de faire garder, par quiconque il voudra, les chêteaux de Limbourg et de Rode.

Nous Renaus, cuens de Guelre et dus de Lembourg, faisons savoir à tous, ke comme il soit ensi ke Nous aiiens donné à nostre chier segneur et pere Guyon, conté de Flandre et marchis de Namur, les chasteaus de Lembourg et de Rode en warde, ke cest bien no grés et no volontés, ke il donist les dis chasteaus avant en warde, à quiconques mius li plaira, et quant ke nos chiers sires et peres devant dis en fera en bone foi, sans mal engien, ou cius ki les ara en warde de par lui, Nous nous en tenrons plainement à paiiet. Et avons aussi enconvent à tenir le dit et l'ordenance nostre chier segneur et pere, devant dit, dou frait de le warde des dis chasteaus, tant comme il les wardera, ou fera warder et loiaument acomplir, lesquels chasteaus nostres chiers sires et peres devant dis Nous doit rendre, à no requeste et à no semonse, devens le mois ke Nous li semonrons, sauve ce ke nous li aiiens avant rendu le coust et le frait, ke li dit chastel cousteront à warder, ou fait sen gré de ce ke li dit chastel cousteront à warder, à sen loial dit. Et s'il avenist ke de Nous deffalist, avant ke nos chiers sires et peres devant dis Nous eust rendu les chasteaus deseure dis, et avant ke il, dou coust et dou frait ke il aroit fait, por les dis chasteaus warder, fust plainement perpaiiés, Nous oblegons vers lui, por Nous et por nos hoirs, tous nos biens, par où ke on le puist trouver, et volons, ke nos chiers sires et peres devant dis i puist mettre le main, et rechevoir les fruis, tant ke il dou coust et dou frait, ke il ara fait, por les dis chasteaus warder, à sen loial dit soit plainement et entirement perpaiiés. En tesmoignage de la quel chose Nous avons ces presentes lettres saielées de nostre saiel, ki furent faites et données à Niemage¹, en l'an de grace mil deus cens quatre vins et siis, le jeudi apres le Behourdich.

L'original, muni du sceau en cire blanche, aux archives de la province de la Flandre-Orientale.

1 Niemage, Nymwegue.