Historica relatio duodecim martyrum Cartusianorum qui Ruremunde in ducatu Geldriae agonem suum feliciter compleverunt

[p. 75]

Appendix quarta.

Breve SIXTI V. Pont. Max. ad Henricum Cajetanum Regni Angliae & Carthusiani Ordinis Protectorem, & Guilielmum Alanum (gente Anglum) S.R.E. Presbyteros Cardinales, 30. Novembris 1587. quibus Pontifex committit curam Carthusianorum Anglorum, è Patria per tyrannidem Elisabethae Reginae ejectorum, atque in Belgio Catholico, sub Protectione Philippi II. Hisp. Regis exulantium.

SIXTUS, Episcopus, Servus Servorum Dei &c. Dilecti filii nostri, salutem & Apostolicam benedictionem.

NOn sine magna animi nostri consolatione intelleximus celebrem Conventum adhuc extare in Belgio Anglorum Monachorum Ordinis Cartusiani, semen videlicet ac sobolem pientissimi Conventûs illius, qui fere totus pro Fidei Catholicae confessione ac Sedis Apostolicae communione, sub impio Henrico octavo Angliae Rege gloriosam sustinuit mortem, eundemque Conventum post plurimas aerumnas miseriasque perpessas in continuo triginta pene annorum exilio, nuper ex Monasterio Lovaniensi ejusdem Ordinis ubi erat hactenus congregatus, in alia varia Monasteria tandem dispersum & divisum esse, ob summam in hâc soevissimâ hęreticorum Anglorum rabie paupertatem, rerumque ad vitam tuendam necessariarum extremam inopiam. Nunc vero Deum Opt. Max. divinâ suâ bonitate ac providentiâ permovisse cor charissimi filii nostri Philippi Hispaniarum Regis Catholici, ut tantum subsidii in singulos menses huic Conventui Cartusianorum Anglicano assignaret, quantum eidem bona ex parte (nisi plures quod optamus in eo Conventu recipiantur) sufficiat.

[p. 76]

Nos itaque, quibus ex Pastorali Officio nostro incumbit omnium Christi fidelium pro viribus curam gerere, & maximè istorum qui tantorum patrum filii sunt ac heredes, ipsique etiam similiter tanta pro Christo Domino nostro & Fidei Catholicae constanti confessione sustinuerunt; achumiliter nobis supplicatum fuerit Catholicorum omnium gentis Anglicanae nomine,⁺ quae nullum praeter hunc habet in toto orbe Christiano Virorum Regularis Instituti Conventum, ut hic jam dispersus, iterum ad cohabitandum in unam Domum recolligatur: Mandamus per praesentes in virtute sanctae Obedientiae dilecto filio Hieronimo Lignano Priori totius sacri Ordinis Cartusiani, caeterisque Ordinis Visitatoribus & Prioribus, qui pium hoc opus promovere possunt, ut quamprimum dispersos hos Carthusianos Anglos in unam commodam aliquam habitationem, vel sui Ordinis, vel alterius cujuscumque, vel etiam soecularem, quae tamen Vobis vel dicti Conventûs Priori pro tempore existenti idonea videbitur, redûci, ibique stabiliri, confoveri & conservari (durante saltem hoc miserabili Angliae Schismate) faciant.

Vobis autem & utrique vestrûm mandamus & committimus per praesentes, ut Authoritate nostra Apostolicâ nostroque nomine cum eodem dilecto filio Priore Generali praedicti Ordinis, ac aliis quibuscunque Christi fidelibus, qui vobis aut alterutri vestrûm videbuntur huic Conventui prodesse posse, & aliquid adjumenti afferre ad hanc nostram voluntatem, implendam sollicitè agatis & procuretis, ut quod in hac re toto corde cupimus cito & efficaciter mandetur executioni. Dictique Conventûs Anglici Priorem & Monachos Cartusianos pro tempore existentes in omnibus semper juvetis, defendatis, ac promoveatis, & omnem denique operam & diligentiam impendatis, ut Angliae hodie (proh dolor!) afflictissimae optimum hoc hujus Ordinis semen in meliora tempora conservetur.

Et cum Nos multis & magnis sumptibus in primis

+ Primus Conventus Monachorum Anglorum exulantium.

[p. 77]

istis nostri Pontificatûs annis gravati circa publica quae Nobis ac Sedi Apostolicae quotidie incumbunt onera, non possimus privatis singulorum necessitatibus prout desideramus nostro aere succurrere; procuretis quoque & faciatis, ut si opus erit honestâ contributione subsidii charitativi alia ejusdem Ordinis Monasteria ditiora hunc Conventum omni favore & charitate dignum, & tamquam sui Ordinis excellens quoddam Ornamentum & decus, juvent promptè & foveant.

Nos enim Vobis & utrique vestrûm ad omnia haec & singula procuranda exequenda & adimplenda Authoritate nostra Apostolicâ plenam liberam & amplam facultatem & potestatem damus & committimus, & per praesentes impertimur: non obstantibus Institutionibus & Ordinationibus Apostolicis, Privilegiis quoque & Indultis ac Statutis, etiam Ordinis praedicti juramento & Confirmatione Apostolicâ renovatis, caeterisque contrariis quibuscumque.

Datum Romae apud Sanctum Petrum, sub Annulo Piscatoris die trigesimo Novembris Millesimo quingentesim ooctogesimo septimo, Pontificatûs nostri A. tertio

Signatum: Thom. Gualterutius.

Vigore hujus summi Pontificis Mandati, & supradictorum Cardinalium Henr. Cajetani & Guil. Alani Praescripti, nec non & Rev. Patris Generalis Ordinis consensu, omnes Patres Angli alibi dispersi Lovanium reverti atque Confratribus suis illic restantibus se jungere cogebantur. Inde vero post tantillam moram Antverpiae, venerunt anno 1591. Mechliniam, agente pręsertim Cardinale Alano tunc Mechliniensium Archiepiscopo designato.

Ibi Cartusiani isti, cum Priore Waltero Pytssaeo, sedem fixerunt in plateâ vulgo de Bleeck-straete, usque ad ann. 1626. quo stabile domicilium obtinuerunt in opido Neoportuensi apud Flandros, ibique in hodiernum diem benedicente Domino, floret hic Carthusianorum Anglorum Conventus.