Goddelicke lof-sanghen

[p. **IIv]

Delicijs Musae Belgicae Reverendi & Clarissimi Viri D. Iusti Harduini FF. Gratulatur Iacobus Cornelius Lummenaeus A Marca

In monte Blandinio ad Gandavum Religios. Sacerdos

IUste Francisci genus Harduini
Vatis aeterni generosa proles,
O cui semper virides corymbi

Tempora nubunt;

Cuius ad plectrum salit omne, quicquid
Rorat in syluis Arabum beatis,
Quicquid Amphion mouet aut canendo

Thracius Orpheus.

Vltrò ad amplexus venit ipsa Daphne,
Nec fugit pressis meditari in vlnis,
Et tuos ultrò sitiens lepores

Αντι-φιλίαν.

Nutrit, & castis recreate Musis
Tecum apud fontes sedet, aut recentes
Colligit tecum violas, & vdi

Florida campi.

Interim nexis manibus canora
Pegasi Nympha melos omne vexant,
Et Deum cantant superos & imos

Valle reposta.

Attamen, quamquam nimis aemulantur,
Non tuam vincunt citharam Sorores,
Et tuam semper citharam coronant

Iudice Phoebo.

Siue cùm dulces modularis hymnos
Lene deducens chelin, & modesto
Copulans Flandros Elegos, hiatu

Carmina fundis;

Siue cùm psalmos acuis virili
Barbito, & longam geminas querelam,
Et super neruos lacrymans, Prophetae

Vota recantas.

Tam bene, vt Paulo meliùs beatus
Ille Sceptuchus, cui saepè totum
Pectus instinxit Deus, & trementes

Imbuit artus.

Macte, et aeterna cane digna cedro
Belgica vates, cui Flandra Pitho
Labra mellito digito perungens

Omnia prompsit.

Scilicet tantus lepor hunc redundat,
Vt mihi totam moueas saliuam,
Cùm thymum & flores auidò ministras

Attica Siren.