Liedekens ende Refereynen Ghemaeckt by Haerlem Soetendal, van zijn Avontueren(1618)– Haerlem Soetendal– Auteursrechtvrij Vorige Volgende Een kluchtich Refereyn, gemaeckt by Haerlem Soetendal. LEstmael quam ick ter plaetsen daer veel Wyven saten. Ende daer wiert den Bybel gheheel ontsloten, Van den houwelijcken staet was haer lieder praten Hoe dat hy vol droefheydt was tot mijnder onbaten Dat heeft boven maten my seer verdroten Stracks heeft my een Out Wijf vooren gheschooten, Van haren Man veel groote plaghen Met weenende Ooghen daer de tranen uytvlooten Als vloeyende goten // en zeyde wat quade daghen Dat zy in haren staet hadde teghen mijn behaghen En zy moest verdraghen // veel slaghen // met nijpen // pijn Ick zey in mijn selven: Ick moet nochtans wagen al hoorde ick noch sevenmael so seer klagen VVie weet oft waer is, het mogen wel pypen,, sijn. Somma dit klaghen en acht ick al niet Maer zwaerder verdriet // leyden zy my vooren Van een drollighe kluyte die nu korts is gheschiet, Luystert naert bediet // ghy sullet haest hooren, (Te weten) van twee goe lieden verkooren Die hadden ghezwooren // malkanderen Trouwe Met dat zy ghehout waren, gincter al verlooren Langhe eer het eerste Kint was ghebooren, Den Man wiert believen seer van zijn Vrouwe Doort eten van een hamme quamter al in rouwe Om dat hy hadde ghesneden groote kippen // fijn Dit maecte de Liefde int herte seer flouwe, Tis gheschiet (zeyden zy) binnen dese Landouwe. VVie weet oft waer is, het mogen wel pypen,, sijn. [pagina 40] [p. 40] Het ghetal der propheten met witte hoofden, En zoud' ic u ten rechten niet konnen orconden die hier waren geseten, en mijn sinnen beroofden Waer door zy my heel en al verdoofden, Door al den druck die zy daer vermonden dit is in den Evangely der Spinrockens vonden Doch ick; Maer ick zweech voor dees Wijven, (sy zeyden:) wilt ghy wel doen blijft ongebonden Ic en secht maer alleene tot u beclyven, Men zoud' in Boecken niet connen beschryven den druc die als dan int herte gaet nypen // dijn, Dus wilt u niet ander genoechte gheryven want wist gy tverdriet gy sout wel thuys blyven, VVie weet oft waer is, het mogen wel pijpen,, sijn. Princelijcke Minnaers, wilt u verjolysen Al hoort ghy misprijsen // door quade blamatie den staet des houwelijcks met quade afvijsen Sy en zoudent u met recht niet konnen bewijsen, Dus en acht niet op knysen van paus Iannes natie Al spronghen zy achterwaert van desperatie Laet haer predicatie // van u zijn ghedreven Ghelijck ic dede, want mijn Liefs fondatie, Stont sonder quellatie // int Herte gheschreven, Zy terden, zy raesden, schuymbeckten, en keven Om dat zy met recht niet en costen begrypen // mijn Ick seyde ic moet seggen, al kosten t'mijn leven, Ter eeren den staet des houwelycks verheven VVie weet oft waer is, het mogen wel pijpen,, sijn. Botten bloeyen hooghe. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij