Liedekens ende Refereynen Ghemaeckt by Haerlem Soetendal, van zijn Avontueren

Een ander scheytliet aen sijn Vrienden

Op de wijse, Met dese blyde mare.

ICk wil gaen openbaren, mijn hert met blyden sin
Is gheneghen tot varen
De wilde ZeeWaerd' in
dus bidt doch God verheven,
Dat hy my in 'tghemoet,
Wil komen sonder sneven,
Ende uyt jonsten gheven,
Ghenadighen voorspoet.

Maer eerst segh ic alvooren, allen alsoot betaemt

Aen mijn Broeder verkooren, Ioos van der Ham genaemt,
Fransijntgen u Huysvrouwe, Segh ick adieu ter Ste,
Mijn lief Suster ghetrouwe, God behoed' u voor rouwe,
En al u kinders me.

Passchier van Westbusch Broeder, Ick segh adieu tot dy

Bidt God onsen behoeder, Doch altemet voor my,
Ianneken Boddens reene, Suster ick segh adieu
God behoed' u voor weene, Met al u kinders kleene,
hier me tot op een Nieuw.

Ick mach oock niet vergheten, adieu te segghen jent,

Mijn Suster wijt gheseten, Beliken Ians bekent
Ick beveel u den heere, int scheyden van u hier
Draecht sorghe t'allen keere, Voor u vier kinders teere
Waerschoutse voor dangier.

Tvergaderen vol vreuchden, is, maer tscheyden vol druc,

heere sterckt my in deuchden, hoed' my voor ongheluck
princelijck God almachtigh, die allen druck kan scheen
Wilt my wesen gedachtich, geeft my door u hant krachtich
Dat wy komen by een.

Botten bloeyen hooghe.