Schola cordis

[fol. **1r]

In Scholam Cordis

Reuerendi in Christo Patris ac Domini D. Benedicti Haefteni,

Monasterij Affligeniensis Praepositi dignissimi.

COR Animae sedes, rapidi Cor furnus amoris,

Vnde tot enatae, tela timenda, faces;

Quàm vario, inconstans Cor, saepè ardore calescis;

Rarò Christe tuo, Cypria saepè tuo:

Non sic excussas, venti ludibria, naues

Hippotadae, quasso, ventilat ira, salo.
Aestuat, & propriis Cor mobile fluctuat auris;

Nec potis adductâ sistere vota manu:

Nunc placet oppanso malè splendida gloria fuco,

Spiculaq́ue obtruso calcare subdit honos:

Nunc iuuat horrifico taratantia classica bombo,

Martiaq́ue egregio sub Duce signa sequi.

Nunc magis aurato cistas cumulare metallo,

Et grauidâ extremos findere puppe sinus:

[fol. **1v]

 

Nec satis est; proprio sidunt haec pondere vota;

 

Grandior exciso germine turba subit.

 

Ancipiti trahitur studia in contraria mente;

 

Vt pila ab aduersa pulsa, repulsa manu:

 

O Cor, caelestis, Cor, floscule, lectule Sponsi;

 

O Cor, ô Animae pars quot acumque mea!

 

Quid te errabundum discrimina mille viarum

 

Ad portum impediunt sistere vota tuum!

 

E caelo es: caelum votorum meta tuorum;

 

Quid caelo natum, turpiter haeret humo?

 

In caelo tuus est thesaurus; scandite vota;

 

Scande Cor, in caelo vitaq́ue, spesq́ue tua est.

 

Mitte graues curas, diuisae retia mentis;

 

Multiplicis valeat vana libido spei.

 

Disce vno caeli, meliori ardore calere;

 

Disce vno vnius igne flagrare Dei:

 

Exige distractum, diuini ad Cordis amussim,

 

Illud habet formae multa imitanda tua,

 

Ne dubites, hanc volue Scholam, Liber iste docebit,

 

Prototypo, inconstans te, stabilire Cruce.