Den lust-hof der Christelycke leeringhe

De deughden der Christelijcke Ionckheyd.

Vra.

VVAt deughden meest betaemt
Dat de kinders verkrijghen?

Ant.

⁺Dees' dry, Eerbaere schaemt',

Ghehoorsaemheyd, Stil-swijghen.

+ Bern. de ordine vitae.

[p. 315]

[p. 316]

Liedeken van de deughden, die de kinderen betamen.

Op de wijse:
Beata immaculata.
Mijn Heere, mijn Godt mijns herte. pag. 309.

GHy Kinders, komt vlijtigh leeren
Dat uw' siel baeten sal:
Maeckt dat ghy de vrees' des Heeren
Besitten mooght voor al.

Ghy jonghe Jeughd,

Aenveerdt de deughd,

Wilt ghy met Godt eens zijn verheught.

Dry deughden seer wel betaemen
De Jonckheyd t'aller tijdt,
1. Stil-swijghen, 2. en eerbaer schaemen,
3. Ghehoorsaemheyd met vlijt.

Ghy jonghe Jeughd,

Aenveerdt de deughd,

Wilt ghy met Godt eens zijn verheught.

⁺Leert swijghen, wilt 'tklappen vlieden,
Met Meerder weynigh spreeckt:
Want daer veel woorden gheschieden,
Seer selden sond' ghebreeckt.

Ghy jonghe Jeughd,

Aenveerdt de deughd,

Wilt ghy met Godt eens zijn verheught.

⁺Hebt schaemte van quaede wercken,
Weest altijdt ghemaniert:
Op d'eerbaerheyd wilt oock mercken,
Die de Jeughd wel verciert.

Ghy jonghe Jeughd,

Aenveerdt de deughd,

Wilt ghy met Godt eens zijn verheught.

+ 1.
Swijghen.
Eccl. 32. 13.
Prouer. 10. 19.

+ 2.
Schaemte.

[p. 317]

 

Vw' Ouders, en die u leeren⁺

 

Sult ghy ghehoorsaem zijn:

 

Bemindt hen, en wilt hen eeren,

 

Ghelijck een kindt seer fijn.

 

Ghy jonghe Jeughd,

 

Aenveerdt de deughd,

 

Wilt ghy met Godt eens zijn verheught.

 

 

 

Dees' deughden wilt nu aenkleven,

 

V hert' daer noyt af keert:

 

Soo doet-men meest al sijn leven,⁺

 

Als-men van jonghs af leert.

 

Ghy jonghe Jeughd,

 

Aenveerdt de deughd,

 

Wilt ghy met Godt eens zijn verheught.

Vra.

VVAt maeckt de Jeughd soo quaed,
Dat-se selfs loopt ter hellen?

Ant.

Quae' wercken, quaeden raedt,

En quaede mee'-ghesellen.

+ 3.
Ghehoorsaemheyd.

+ Prouerb. 22. 6.

Leert in uvve jonckheyd.

Leert vroegh in uwe jeughd,
Den tijdt wilt niet vergheten:
Die van jonghs leert de deughd,
Sals' in sijn' oudtheyd weten.