Tot den leser.
Also den geest my in myn jonckheyt beruerde over die deerlyckheyt die ick hoorde vertellen, die dicwils die landen ende steden overquam, so ben ick geneijcht geweest 'tgene dat ick hoorde ende sach te bescryven tot een memorie voer my ende voer andere na my, ende beghinde met den jaere ons heeren 1565 doen't in Nederlant redelyck stil ende peys was geweest sommige jaeren. Maer in Vranckeryck sendt den jaere 1561 was groote beroerte in vuel steden binnens landts om saecken der religien aengaende. Ende slecht en simpele van sulcx so, en begrepe ick niet, maer begonde met den couden winters die 't doen was, dwelck in menschen leven niet gesien en was.
Dit brocht my tot scryven, synde 18 jaeren, geboren in 't jaer van 1546 in Julis, makende voer oock wat verhaels van den enghelschen die twistich waeren. Maer na dat ick vùel papiers bescreven hadde tot den jaere van 1574 toe, en dochte 't my goedt dat eens te herscryven ende in desen boeck al by een te brengen en weynich gescicter te stellen en 't sommich, dat van geen estime en was uyt te laten oft corter te sluyten. Niet dat ick oyt daer iet toe versiert hadde, hoewel ick wel gescreven hebbe en noch denck te verhalen 't geen dat quay tonghen versiert hadden, en dat om beroerte oft vreese die daer doer quam, dwelck my oock mede nut dunckt, op dat men sulcx lesende, als men altemet quaet gerucht hoort, niet so haest en sou gelooven, want twiststockers oft landtsceynders sulcx altoos pleghen. Oock hope, dat 't gene dat ick scryven sal, sulcx nimmermeer doen en sal om iemant te believen, d' een meer dan d' ander, maer Godt den Heer bidde, dat ick altoos geheelyck in synen weghe mach wandelen amen.
Godevaert Van Haecht, tafereelmaker filius petri.
Auteursrecht onbekend