De Psalmen Dauids

Vande gheboorte Christi. D.M.L.

1

VAnden Hemel coem ic tot v,
End' breng' v goede tijdingh nv:
Veel niew' maren breng' ic met my,
Die ick wil vercondighen dy.

[p. 72]

2

V is een kint gheboren // cleyn,
Van een Maecht wtuercoren // reyn:
Een kindeken soo schoon end' fijn
Dat sal v vreucht end' blijschap zijn.

3

T'is Christus, Godt de Heere groot,
V te brenghen wt allen noot:
V Salich-maker zijn wil hy,
Van v sonden v maken vry.

4

Hy brenght v alle salicheyt,
Die Godt de Vader heeft bereyt,
Dat ghy met ons in Hemel-rijc
Soudt leuen nv end' Eewichlijc.

5

Soo mercket nv dat Teeken recht,
De cribb' ende de doecxkens slecht:
Daer vint ghy het kindt in gheleyt,
T'welc onderhout de Werelt breyt.

6

Dies laet ons all' zijn bly voort-aen,
End' met den Herders daer in gaen,
Te sien wat bestelt heeft de Heer',
Hy schenct zijnen Soon' t'onser Eer'.

7

Merct op mijn Hert' ende siet claer,
Wat leyter inde Cribbe daer,
Wiens is doch dat kindeken schoon?
Het is Iesus Godts liue Soon.

8

Weest wilcom, O ghy edel gast,
Die de Sondaers niet laet in last:
Ghy comt in d'Ellend' hier tot my,
Hoe sal ick dies vol dancken dy?

9

Och Heer', alder dinc Schepper recht,
Hoe zijt ghy gheworden soo slecht?
Dat ghy daer light op t'drooghe gras,

[p. 73]

 

T'welck der Ezelen voetsel was.

10

Al waer de Werelt noch soo breet
Met Ghesteenten end' Goudt becleet,
Soo waerse doch v veel te cleyn,
Te zijn een engh' Wieghsken alleyn.

11

V Fluweel end' de Sijde dijn
Grof Hoey end' slechte doexkens zijn:
Daer-op ghy Heer' (noyt ws ghelijc)
Braggheert als waert v Hemelrijc.

12

Dat heeft v alsoo behaecht vry,
De waerheyt aen te wijsen my,
Hoe alder Werelt Eer' noch goet
Voor v niet en ghelt, helpt noch doet.

13

Och mijn zeer liue Iesu soet,
Maect v een reyn saecht bedd' met spoet,
Te rusten in mijns hertzen schrijn,
Op dat ick niet verghete dijn.

14

Daer van ick altijt vrolijc sy,
Te springhen singhen altijt vry
Het rechte Susamine schoon,
Met s'herten lust den soeten Thoon.

15

Lof sy Godt inden hoochsten Throon,
Die ons schenct zijnen liuen Soon:
Dies verheucht haer d'Enghelsche schaer,
End' singht ons een sulc niwe Iaer.