De Psalmen Dauids

[p. 1]

Het Tweede deel,
In-houdende de Psalmen, Lofsangen, Hymnen ende gheestelijke Lidekens, diemen meest inder Christelijker Ghemeynten ghewoonlijc is te singhen.
Wt verscheyden hoochduytsche Sancboecken, inde Nederduytsche Sprake, tot nutticheydt ende voorderinge der Nederduytscher Christelijcker Ghemeynten ouergheset.
[afbeelding]
Psalm. 96.
Singht den Heere een nieuwe Liet: Singt den
Heere alle Werelt
Singht den Heere, ende loeft zijnen Naem:
Predict den eenen dach aen den anderen zijn
Heyl.
Anno 1583.

[p. 2]

DE COMPOSITIEN op de Psalmen, Ouerghesedt wt den Hoochduytschen dichte.

Den II. Psalm.

1

HElp' Godt hoe gaet het inden treyn,
Dat alle Volc soo grimmet:
Vorsten Coninghen all' ghemeyn
Die zijn all' eens ghesinnet,
Te wederstrijden dijne Handt,
End' Christo dien ghy hebt ghesandt,
De heel werelt te helpen.

2

Sy willen gansch ongestraft zijn,
Leuen na hunnen sinne,
End' worpen van hun den raet dijn,
End' wat ghy leert daer-inne.

Na huns Herten ghemoet sy gaen,

Een yghelijc op zijne baen
End', laten hun niet weren.

[p. 3]

3

Maer ghy hooch in des Hemels graet
O Godt, sultse belachen,
Bespotten hunnen besten Raet,
Hunnen aenslach verachten.

Ghy sult met Tor'n hun spreken aen,

Straffen wat sy hebben ghedaen,
Met grim sult ghyse schricken.

4

Godt heeft t'eenen Coninc gheset
Christum, dien ghy maect cleyne,
Op Sion zijnen Heyl'ghen Berch,
Dats ouer zijn ghemeynte.

Dat hy soud' condt doen ouer al

Des Vaders sin end' welgheual,
Ende leeren zijn Wetten.

5

Hy sprac tot hem: ghy zijt mijn Soon,
Hed' hebb' ic v gheboren,
Vanden dooden verwecket schoon,
End' in v wtuercoren

Voor Eruen end' voor kind'ren mijn,

Die gheloouen den name dijn,
Dat sy all' door v leuen.

6

De Heyd'nen wil ick schenken dy
Mijn kint, tot eender eruen,
Dat ghy met v woort in hun vry
Des Vleeschs lust soudt verderuen,

Een nieu volc sult ghy rechten an,

Dat mijnen name prijsen can
Aen allen oordt op aerden.

7

Daer-om ghy Coninghen merct nou,
Ghy soudt v laten leeren,
End' hooren desen Coninc trou,

[p. 4]

 

Sijn Woort houden in eeren:

 

Dat ghy Godt leeret vreesen al,

 

Hoe hem een hert' betrouwen sal,

 

Dat heet recht Godt wel dinen.

8

Neemt op de straff' ghewillichlijc,
Dat niet vertoorn' de Heere,
Houdt hem voor ooghen stadichlijc,
End' leeft na zijnder leere:

Als zijnen Toorn' als Vier op-gaet,

Wie ist dan die voor hem bestaet?
Dat zijn die hem betrouwen.1. Gloria.