De Psalmen Dauids

Den cxlviij. Psalm.

Is een dancsegghinge, ende dies souden alle creatueren Godt oock louen ende dancken, om dat het God al onderhoudt, ende sonder hem ooc sonder zijn bystant ist al om niet.

Haleluia.

1

LOeft ghy Hemelen den Heere:
Loeft des Alderhoochsten macht.
Loeft hem Enghelen in eere:
Loeft hem alle zijn heyrcracht.
Loeft hem ghy Sonn' ende Mane:
Loeft hem alder Sterrenlicht.
Loeft hem hemelen voort-ane:
End' waters in t'hoogh' gesticht.

2

Die sullen louen Godts name,
Want alle dat hy ghebiet,
Dat wort gheschapen bequame.
Hy onderhouts' Eewich, siet:

[p. 386]

 

Hy beueelt hun dats' eendrachtich,

 

Niet anders en moghen gaen,

 

Ende hy ordonneert crachtich

 

Dat sy soo al moeten staen.

3

Wilt op Aerd' Godts lof oorconden,
Ghy Wal-visschen groot end' stout,
End' ghy alle diep' Afgronden.
Vier, Damp, Haghel end' Sneeu cout,

Storm-winden niet om we'erhouden,

Die zijn woort wt-richten snel:
Dees' all' den Heer' louen souden,
Hem prijsen end' dancken wel.

4

Alle Berghen groot end' cleyne,
Ghy vruchtbare Boomen al,
End' Cederen all' ghemeyne.
Ghy Diren in groot ghetal,

End' ghy Vee op Bergh' end' dalle,

Ghy ghewormte menich-foudt,
Voghelen met soet gheschalle,
Loeft Godt alle Ionck end' Oudt.

5

Ghy Coninghen op-der eerden,
Alle lieden met aduijs,
Vorsten diemen houdt in weerden,
Op aerd', all' ghy Richters wijs.

Ionghelinghen end' Ionc-vrouwen

Met herten, moet ende sin:
Ghy ouders in goeder trouwen,
Ende de Ionghers niet min.

6

Die sullen gheheel aendachtich
All' louen des Heeren naem:
Want zijnen naem is warachtich

[p. 387]

 

Bouen alle dinc lof-saem,

 

Hy is alleene zeer hooghe:

 

Sijnen lof soo wijde gaet

 

Als den Hemel, in t'verthooghe,

 

Ende ghelijck d'Aerde staet.

7

Ende hy verhoocht den Hoorne
Van zijnen volcke bemint,
Gantsch sullen zijn wt-vercoorne
Tot zijnen Lof zijn ghesint:

De Kind'ren Israels blijde,

T'volc dat zijnen wil' volbringt,
T'welc hem dient tot allen tijde:
Vrolijc Alleluia singt. Haleluia.