Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XXXVIII.

 
Alse ons de linten wert gheboren
 
Soe es men scoenre tijt in waen
 
Dat bloyen sal gars ende coren
 
Daer de meneghe op mach vervaen
5
Selc hevet op toeverlaet ghedaen
 
Dies hem bleef int herte toren
 
Maer die minnen met minnen wilt bestaen
 
Hi comt te sinen best te voren.
 
 
 
Oec bloeyen in den zomer bloemen
10.
Vele daer cleine aen es belanc
 
Wij willen ons ter minnen noemen
 
Die nie gherechte minne en dwanc
 
Selc maket van minnen nuwen zanc
 
Ende wilt hem ghelucs van hare beroemen
15
Dien minne doet goet hi weets haer danc
 
Van hare hebbic el cleine dan doemen.
 
 
 
Ay na dien dat die minne ghehinget
 
Dat ic clage doemen ende herten noot
 
So ne hebbic voer haer gheen ghedinghe
20.
Mijn recht es cleine haer cracht es groot
 
Men zeghet de zwane alse hi de doot
 
Ghesmaken sal dat hi dan singhet
 
Want soe ye minne van mi ghebood
 
Dat willic dat si al volbringhe.
 
 
25
Ay minne al houddi mi dus swaer
 
Dat mi de tijt verswaret al
 
Ghi gevet uwen caren openbaer
 
Uwe clare wondere al openbaer
 
Ay dicke en wetic wat ic sal
30.
Alse ghi mi houdet soe wee in vare
 
Wie met u clemt ic blive int dal
 
Mi gruwelt dicke hoe icke vare.
 
 
 
Ay minnen die doch mochte vergheten
 
Dat grote leet dat gi ons doet
35
Ende wat ghi den meneghen hebt geweten
 
Den enen wreet den anderen goet
 
De zelke besitti in uwe woet
 
Dat hi van binnen al wert gheten
 
Die selke sijn saechte van u ghevoedt
40.
Ende sijn van u doch onbeseten.
 
 
 
Van minnen machmen wonder spreken
 
Haers wonders werke wat dat si
 
Si toent met liste den selken hare treken
 
Alse ic al di ende du al mi
45
Si comt den zelken zaen soe bi
 
Dat sine gherijnt op therte breken
 
Ende selken laetse haer al vri
 
Dus canse ontweghen ende weder reken.
 
 
 
Te niete werden al in minne
50.
Dat es dat beste dattic weet
 
Van alden werken die ic kinne
 
Al weetict mi wel onghereet
 
Ende die de minne met niede dan besteet
 
Al sonder herte ende sonder sinne
55
Ende minnen dan niet met niede versleet
 
Dats cracht daer men bi minnen ghewinne.
 
 
 
illustratie Voert ane meer wien lief wien leet
 
Die de minne met niede can ontghinnen
 
Sine can verweren die storme heet
60.
Hine wone ghelijc met haer daer binnen.

Vorige Volgende